WILLEMSTAD.- Riba dia 6 di novèmber na aña 1967, Kòrsou a eksperensiá un di e desasternan mas grandi ku el a yega di konosé. Brùg Juliana – ku tabata den konstrukshon i ku tabata kasi kla – a kai den otro. Tonnie Hassell (71) ta un di e poko hendenan ku despues a tribi di bai traha e brùg di nobo.
Hassell ta alumno di Sint Thomas College na Otrobanda, ora ku brùg Reina Juliana a kai den otro riba djaluna mainta 6 di novèmber 1967. E zonido pisá di heru ku ta krak. I despues un klap enorme… “bragadam!”, e ta konta.
Hassell por weta riba dak di su skol e devastashon. Nan tur, alumno i dosentenan, a keda babuká. Loke ainda nan no sa, ta ku loke a sosodé a kosta bida di 15 hende ku tabata trahando riba e brùg.
Dos aña despues, Hassell ku 18 aña no a duda ningun momento ora el a tende ku nan ta buskando hende ku lo kier kaba e brùg. Su tata a fayesé i su famia tabatin mester di plaka, e ta konta. Pa e labor ‘riba brùg’ lo tabain un bon salario, el a tende. Hassell tabata yòn, delegá i e no tabatin miedu di nada. E plan pa bai studia despues di su skol, el a disidí di pone esei un banda pa un ratu.
Trabou pisá i eng
E asuntu di traha e brùg di nobo tabata algu basta duru: mester a traha shete dia pa siman, pasó e desaster a trese retraso. Hassell a haña un trabou ku ta duna hende hopi miedu. Ora e wayanan brua, ta e mester drenta den un baki ku nan ta saka for di e brùg, pa e bai saka e wayanan for di otro. E tabata sinti henter e brùg ta sakudí.
Hassell no tabata sinti ningun klase di miedu di ta den altu aya, apesar di tur difikultat, dor di e konstrukshon huntu ku un tèrmometer. Si ta den e konstrukshon un punto ta birando kayente, esei ta nifiká ku e preshon riba e parti ei ta birando muchu grandi. E balki di metal ku ta yuda soportá por kibra. Tambe e ta gatia pa yena zeta atrobe den e instrumento hidróuliko.
Hassell tabatin tur konfiansa den e profeshonalnan ku ta guiando e konstrukshon. Ningun momento so e tabata sintié insigur, e ta bisa. E ta ripará ku awor si nan ta teniendo kuidou ku e forsa enorme di bientu ku por tin. Tambe e ta ripará ku tin mas material ku ta sostené hinter e konstrukshon.
‘E desaster di mas grandi’
Despues di tur e añanan ku a pasa, Hassell ta prinsipalmente orguyoso riba kon tòg nan tur a logra kaba e brùg. E ta kòrda riba e momentu ku tur dos banda di e brùg a topa otro; e delaster kuater sekshonnan ku kran a hisa den un biaha bai ariba. Ei bou den bahia di Santa Ana tabatin shete, ocho boto grandi tabata warda e momentu supremo, nan a kuminsá pita. “Nos a logra!”
Despues di e konstrukshon, Hassell a bai Hulanda pa studia konstrukshon. E tabata traha den waf i riba diferente brùg. Pero nunka mas riba algu asina espektakular, manera e tres añanan spesial ei na Kòrsou. Awor, mas ku 50 aña despues, e ta realisando kon peligroso tabata pa konstruí brùg Juliana. E ta pensa kada biaha riba e tempu ei.
Ora e ta na Kòrsou, semper a ta tuma un momento pa reflehá na pia di brùg. Na e monumento pegá ku brùg, su pensamentunan ta ku e 15 víktimanan di e desaster. Esnan ku a duna nan bida pa desaroyo di Kòrsou, e ta bisa.
Den kuminsamentu di añanan 90 tabata e delaster biaha ku el a logra bai e konmemorashon di 6 novèmber. Hopi tristu, pero tambe bunita i digno, e ta bisa. Tanten ku e famianan ta na bida, Kòrsou mester sigui rekordá loke a pasa, segun Hassell.
Na final di e entrevista, Hassell su bos ta kibra. “T’e desaster di mas grandi ku Kòrsou a yega di konosé. E kos aki ta duel mi te ainda.”
Ta kiko a bai robes na 1967?
A disidí di konstruí e brùg aki pa kombatí e fila largu ku tabata tin banda brùg di ponton, ku tambe ta konektá Punda ku Otrobanda. Brùg Juliana ta 54,6 meter altu. E ta konsistí di 50 diferente sekshon; 25 na kada banda di bahia. Pero ora nan a bai pone sekshon 23, na e banda di Punda, kos a bai sumamente robes. ‘E suspenshon ku ta ankra e brùg, a kibra, i 1.600 tonelada di heru a kai ku basta bochincha bin abou; pa un parti den bahia di Santa Ana.’ (Fuente: Nationaal Archief Curaçao)
