Ministerio di Hustisia di Kòrsou i Ministerio di Seguridat Públiko i Hustisia di El Salvador tin planiá pa firma un deklarashon di intenshon (Letter of Intent) djabièrnè 13 di novèmber pa fortalesé nan kolaborashon riba tereno di hustisia i seguridat públiko.
E kolaborashon ta enfoká prinsipalmente riba interkambio di konosementu, fortifikashon institushonal i atendementu konhunto ku kriminalidat ku ta atraversá frontera. E kolaborashon ta remarkabel, pasobra e presidente di El Salvador, Nayib Bukele, ta risibiendo hopi krítika internashonal pa violashon di derechonan humano, arestonan masal i kondishonnan deplorabel den megaprizònnan ku demasiado hende aden.
‘Míles di siudadano inosente será’
Desde ku Bukele a proklamá estado di emergensia na 2022, a detené mas ku 80.000 hende. Organisashonnan manera Amnesty International i Human Rights Watch ta raportá ku den esaki a sera míles di siudadano inosente tambe, sin prueba òf un proseso hustu.
Banda di esaki, e anunsio ta remarkabel pasobra Kòrsou no tin su propio maneho di relashonnan eksterior. Huntu ku Defensa, esaki ta kai bou di responsabilidat di Hulanda. No opstante esei, e deklarashon di intenshon ta ofresé ‘e posibilidat pa kolaborashon riba tereno di kombatimentu di krimen organisá, maneho di migrashon i prevenshon di krimen sibernétiko’, segun minister di Hustisia, Shalten Hato (MFK). Te ainda no tabatin reakshon for di Hulanda riba e anunsio di firmamentu di e deklarashon di intenshon.
Mantenshon di lei mas efektivo
Tambe ta eksplorando posibilidatnan pa entrenamentu, bishita di trabou, kolaborashon tékniko i interkambio di konosementu entre e dos paisnan, Hato ta bisa. E ta enfatisá ku kolaborashon internashonal ta duna Kòrsou perspektiva nobo pa un mantenshon di lei mas efektivo. “Semper nos legislashon, estado di derecho i protekshon di derechonan fundamental lo sigui ta e guia den esaki. Nos meta final ta, i ta keda: un Kòrsou mas sigur.”
A pone e base pa e kolaborashon akí dia 26 i 27 di novèmber 2024, ora ku Hato a partisipá na e Conferencia Internacional sobre Estado y Democracia (CIED 2024) na El Salvador. Durante e konferensia akí, kaminda entre otro demokrasia, estado di derecho i seguridat públiko tabata sentral, minister Hato a sera konosí ku su kolega salvadoreño, minister Héctor Gustavo Villatoro Funes.
E promé kontakto akí a duna motibu pa eksplorá posibilidatnan di kolaborashon mas aleu entre ámbos ministerio. Despues di konsulta i negosiashon na nivel di ámtenar, Konseho di Minister di Kòrsou a bai di akuerdo na aprel 2025 pa drenta den e kolaborashon akí. Ku e deklarashon di intenshon akí, Kòrsou i El Salvador ta dal un siguiente paso den nan kolaborashon bilateral, segun Hato.
Dia 26 i 27 di novèmber 2024, ora ku Hato a partisipá na e Conferencia Internacional sobre Estado y Democracia (CIED 2024) na El Salvador. Portretnan Facebook
