DEN HAAG – Gilbert Isabella fin di 2017 mester pone su funshon di Representante di Reino abou. Minister demishonario Ronald Plasterk ta primintí esaki bou di preshon di diferente partido ku urgentemente a pidi aklarashon.
Mal informá
Na 2014 e minister a primintí Kamer ku e nombramentu lo ta bálido pa tres aña so, na lugá di e seis añanan di kustumber.E tres añanan ta kaba dia promé di sèptèmber 2017, pero te ainda no a adaptá e lei. E siman aki Kamer tabata masha prekupá ku Isabella lo a keda traha mas largu, pasobra Plasterk kontra Antilliaans Dagblad den relashon ku Isabella a referí na e lei ku no a adaptá ku ta papia di seis aña.
Awor Plasterk ta bisa – despues di un karta di urgensia di Tweede Kamer – ku e lo tene su mes na su promesa anterior. Isabella lo keda tres luna èkstra si, e minister ta skibi. Probablemente e ora ei e gabinete nobo lo mester buska un Representante di Reino nobo.
Aliviá
“Ke men ministerio no a tene su mes na e palabrashon. Lástima di tur e inkietut ku e ministerio a krea, pero bon si ku finalmente e minister ta tene su mes na palabrashonnan ku Kamer”, e miembro di Kamer di SP Ronald van Raak ta bisa di e reakshon di minister Plasterk awe.
E echo ku no a adaptá e lei di nombramentu ainda, den práktika no ta hasi diferensha, Van Raak ta enfatisá. “Si un minister primintí algu na Tweede Kamer, e ora ei esei ta sosodé.
P’esei VVD, PVV, CDA, D66, GroenLinks, 50Plus i SGP a sostené e petishon di urgensia di e miembro di Kamer di SP Ronald van Raak pa e minister aklará. Plasterk i Isabella nan mes partido, PvdA, tambe.
