WILLEMSTAD – Tin speransa pa Koraal Specht. Sinku aňa despues di morto di Helmin Wiels, por nota un kambio. Despues di proyektonan pa saka e bario for di su isolashon, e situashon a kuminsá drecha. No ta reina miedu mas.
Mileeny Valentijn (16) ta biba na Koraal Specht i ta den klas 2 di Amador Nita VSBO. E hóben ta kontentu ku tin mas aktividat sosial den e bario i ku e por sinti su mes mas liber. “Ta e habitantenan mes mester koperá pa nos tin un mihó bario.”
Algun di e sospechosonan ligá ku asesinato di Helmin Wiels ta biba den Koraal Specht. Ademas ta reina e impreshon ku kriminalidat den e bario ta motibu pa evitá trafikashon einan. E habitantenan mes no tabatin kontakto ku otro, bisiñanan no ta papia ku otro miéntras ku e muchanan tabata keda será den kas.
Sentro di Dama (SEDA) ta yuda e bario sali for di isolashon. E organisashon di hende muhé ta organisá programanan ku ta subi outoestima i seguridat dje habitantenan.
Ultimo dos aňa SEDA a organisá tambe e proyekto ‘Flor di Hubentut’, prinsipalmente pa e hóbennan.
Riba bon kaminda
Profesor Yvonne Sliep – potret: Dulce Koopman
E proyekto a bira posibel ku koperashon di profesor Yvonne Sliep, sikólogo i dosente na Universidat Kwazulu Natal di Sur Afrika. Sliep ta entrenadó di e metodologia di ‘Life Story’.
E programa a yuda bario di Koraal Specht bira un mihó bario? Segun Yvonne Sliep tin vários motibu pa asumí ku Koraal Specht i su hendenan ta riba bon kaminda.
Resientemente SEDA a re-evaluá e programa den e Sentro di Bario di Koraal Specht. Segun Mirtha Leetz-Cijntje, e habitantenan a skirbi hopi historia di éksito. Entre otro nan a pidi mas aktividat sosial i tambe un sentro di bario.
Mirtha Leetz-Cijntje ta konta di e proyekto
Algun luna pasá e sentro di bario nobo a bira realidat. Mayornan ku yu hóben a pidi pa nan yunan por sigui studia, loke ku tambe a bira posibel den vários kaso.
