DEN HAAG – Senado (Eerste Kamer) ta bai papia atrobe ku sekretarionan di estado Van Ark (Asuntunan Sosial) i Knops (Relashonnan den Reino) tokante e tardamentu di un mínimo sosial pa Boneiru, Saba i Sint Eustatius. Lo manda un karta tokante esaki otro siman.
Senado a spera ku e zomer aki gabinete a establesé un suma ku un hende mester minimalmente pa por biba na e islanan. Senado a pidi esaki for di 2016. Gabinete ta bisa ku ta te despues di un evaluashon na aña 2020 numa nan por bini ku un mínimo sosial.
“Mi no por komprondé. Nos ta trahando riba dje ocho aña kaba i tin dos rapòrt”, senado di VVD Frank van Kappen a bisa den e deliberashon di òktober. Partido di koalishon ChristenUnie tampoko no ta komprondé pakiko por determiná e suma ei pa 17 mion hende na Hulanda Oropeo si, pero ku mester tarda asina tantu pa 25 mil hende den Karibe.
Tòg lo no bini un debate
Durante di e deliberashon por a ripará bon ku e senadornan tabata iritá. Pafó di sala tabata papia tokante e posibilidat di tene un debate di nobo. E bia aki no ku e komishon, sino ku tur 75 senador i ku e posibilidat di un moshon pa pidi gobièrnu bini ku un mínimo sosial mas pronto posibel.
Pero por lo pronto lo tin un debate. “Nos no ta mira e balor èkstra di esaki, ya ku nos a kaba di tene un deliberashon oral kaba algun siman pasá”, Ruard Ganzevoort (GroenLinks) presidente di e komishon di Relashonnan den Reino ta bisa.
Karta pa mandatarionan
E karta ku Senado ke manda pa e sekretarionan di estado Van Ark i Knops, lo ‘kontené algun punto”. Kua eksaktamente, esei Ganzevoort lo divulgá te otro siman numa ora ku e karta sali. “Ta importante pa skibi e karta na nòmber di henter Senado, ke men esaki mester sosodé na un manera metikuloso.”
Kiko un karta asina ke men?“E frustrashon den Senado tokante Área Karibense ta mesun grandi”, polítiko Marijke Linthorst ta konta. E tabata senador pa PvdA di 2003 te 2015 den e komishon di relashonnan den Reino. “Si aseptá e karta ei unánimemente, esaki lo hasi impreshon. Gabinete no por ignorá esaki numa. “E igualdat entre Hulanda Oropeo i Hulanda Karibense ta un punto masha importante pa Senado. E senadornan ta haña pa añanan kaba ku mester bini un fin na e trato desigual i arbitrario.” “Ta p’esei”, Linthorst ta bisa , “nan ta masha tenas tokante e mínimo sosial. Kompará ku miembronan di Parlamento, e senadornan no ta kore tras di e ilushon di e momento asina fásil, i nan ta preferá keda den fòndu pa por hasi nan trabou bon. Esaki ta posibel tambe pasobra prensa ta ménos interesá den nan. E ora ei e preshon pa skor ta ménos. Nan lo no laga e tópiko aki bai.” |
Ganzevoort mes a enfatisá djamars ku Senado ta haña ‘e tópiko masha importante’. “Espesialmente pa garantisá ku na final lo bini bon maneho. Redusí pobresa ta e meta grandi pa nos.”
