DEN HAAG – Corsou lo haya mas tempo atrobe pa yega na un acuerdo cu Hulanda riba con nan por drecha nan presupuesto. Secretario di estado di asunto di reino Raymond Knops ta mustra positivo.
Knops ta bisa cu e tin ‘speransa y perspectiva’ pa otro siman e acuerdo muteo lo keda cla. Gobierno di Corsou por conta riba ‘sosten di Hulanda’ pa ‘drecha e situacion economico y financiero preocupante’.
“Nos ta den bon combersacion cu Corsou. El a tuma mas tempo cu ami a spera. Pero otro siman nos tin un reunion extra di Conseho di Minister di Reino”, segun Knops.
E meta original tabata cu lo a yega na e acuerdo awe mes. Ki obstaculonan tabatin? “Mi no ta bay bisa publicamente kico e problemanan ta”, Knops ta reacciona. “Pero tin suficiente riba mesa na e momento aki pa por firma un acuerdo.”
Si esaki lo nifica cu Corsou lo scapa un directiva di berdad awor cu lo yega na un acuerdo cu Hulanda, ainda no ta keda cla.
