WILLEMSTAD – “E situashon di seguridat n’e pòmp di gasolin na Cas Cora i esun bieu di Pablo Frederik na Saliña ta preokupante i mester di atenshon urgente”, Ronny Cornelis hefe di IJkwezen ta alertá.
Segun Cornelis e situashon n’e dos pòmpnan aki ta idéntiko na esun di Sta. Helena kaminda un trahadó a pèrdè su bida komo konsekuensia di un eksploshon ku a surgi dia 19 di yanüari último na momentu ku un trùk di Curoil tabata abastesé e pòmp aki ku gasolin.
Un reportahe di José Manuel Dias
Tiki distansia
Na tur dos pòmp e tankinan di kombustibel ta pegá ku e edifisio ku chèns ku gas ta penetrá den dje i den kombinashon ku un chispa por kousa un eksploshon. Na Sta. Helena e boka di e tankinan ta na apénas un meter di distansia for di e kasita kaminda e kahera ta sinta. Tambe na e pòmp di gasolin na Kas Chikitu ku ta bou di maneho di Curoil tin un situashon di atenshon. Pegá ku e instalashonnan di e pòmp aki tin un kas di transfòrmátòr di Aqualectra i un generator ku ta keda hopi serka di e tankinan di gasolin.
Kòntròl ta wantá
No opstante e eksploshon na Sta. Helena te ainda no a kuminsá kontrolá e demas pòmpnan di gasolin riba seguridat. “E reglanan di seguridat pa pòmpnan ta hopi bieu i mester aktualisá esakinan promé ku bai kontrolá”, Paul Berkeveld hefe di Inspekshon di Labor i Seguridat na Trabou ta argumentá. Ta spera ku denter di un siman lo por presentá e eksigensianan nobo na Konseho di Minister.’
Peliger ora ku ta yena tankinan ku gasolin – José Manuel Dias
Eksigensianan di seguridat
Segun e eksigensianan aktual e tankinan di kombustibel mester ta bou di tera i e pòmp di gasolin mester ta na un distansia di 15 meter for di e punto sentral di kaminda. E tankinan mester tin un pipa di kuater meter haltu pa saka e gas ku ta keda produsí na momentu ku ta yena e tankinan i mester tin aparatonan pa paga kandela. No tin stipulá un distansia mínimo entre e tankinan di kombustibel i e edifisio i/òf e dispénsernan di gasolin.
James Wilson di Brantwer den kòmbersashon ku José Manuel Dias
Uso di materialnan ku no ta chispa (vonkvrij) i instalashon di aparatonan ku ta midi konsentrashon di gas ta entre e eksigensianan nobo ku lo mester bai garantisá mas seguridat na pòmpnan den futuro. Esaki di akuerdo ku James Wilson, kordinadó di e departamentu di prevenshon di Brantwer Kòrsou. Di e 27 pòmpnan di gasolin ku tin na Kòrsou 20 porshentu mester di un renovashon kompletu di nan ekiponan. Un di nan ku ta den hopi mal estado ta esun na Kas Chikitu.