ORANJESTAD – Diestres arubano so a mèldu komo boluntario pa yuda limpia zeta na kosta nort di Aruba e dianan aki. Rino Hermans, direktor di e Ofisina di Kombatimentu di Desaster, ta bisa ku mayoria hende a mèldu pa wikènt. Pero no ta sigur si e servisionan di gobièrnu ta tene aktividat di limpiesa den wikènt.
Serviso Arubano di Obranan Públiko (DOW, Dienst Openbare Werken) ayera a disidí pa diariamente pone diferente tim pa limpia e playanan i bahianan na kosta nort. Fin di aprel un desaster di zeta a tuma lugá na Trinidat kaminda un kantidat grandi di zeta krudo a lèk for di un tanki di zeta di e kompania di zeta di estado Petrotrin. E zeta krudo e último dianan aki a laba yega Aruba, Boneiru i Kòrsou.
Parke nashonal Arikok a habri un registro di inskripshon pa boluntario. For di djamars anochi tin yamada pa bin yuda e dianan binidero huntu ku timnan di DOW i e servisio di kohe sushi Serlimar.
E parti ost di kosta nort, entre Rincon i Boca Grandi a haña sla duru, Rino Hermans, direktor di e Ofisina di Kombatimentu di Desaster ta bisa. Te ainda e playanan na kosta sùit di e isla no a susha. No ta sigur si e aktividatnan di limpiesa lo sigui e wikènt aki. “Ta posibel ku e kantidat di pida pida zeta di repente lo bira ménos. Ademas trabou den wikènt ta kosta èkstra. Pero tur servisio ta pará kla”, segun Hermans.
Claim
Tin grupo di hende ku di nan propio inisiativa ta bai playa pa piki e pidanan di zeta. Hermans ta deskonsehá esaki. “Ta trata di mas kos ku solamente limpia e playanan. Nos mester traha ku presishon pa tuma un inventario di tur e material dañino ku a piki”, Hermans ta enfatisá. E ta deklará ku tur aktividat ta tuma lugá bou di supervishon di Regional Marine Pollution Emergency, Information and Training Centre (REMPEITC). Ku e inventario por eksihí kompensashon pa daño i perhuisio di e kompania di zeta Petrotrin di Trinidad.
P’esei ta importante pa identifiká e zeta pa medio di investigashon komo e zeta ku a lèk for di un tanki na e refineria di Petrotrin na Pointe-a Pierre na Trinidad. E proseso ei ta koriendo aktualmente, Hermans ta bisa. Despues por warda e tarballs i e plaknan di zeta den un pos bieu di breu riba e tereno di refineria na Aruba.