ORANJESTAD – Michella Matos y Gilbert Croes, mayornan di Zinnia Croes cu a fayece despues cu un agente policial a dal’e cu auto, a organisa un manifestacion ayera na Bestuurskantoor. Motibo pa esaki ta cu nan kier un aclareacion oficial di parti di Ministerio Publico riba pakico a dicidi pa no lanta un caso penal contra e polis.
Matos y Croes ta haya cu nan yiu merece un chens pa su caso wordo trata. Nan a wordo ricibi pa minister di Husticia Arthur Dowers, cu lo a bisa nan cu e lo bay puntra pa un presentacion riba e caso, mirando e foutnan den e rapport policial cu e mayornan a mustre riba dje.
Ariën Rasmijn den combersacion cu Michella Matos y Gilbert Croes
Zinnia Croes di 12 aña a perde su bida na maart 2015 despues cu un agente femenino cu tabata bou influencia di alcohol a atropeye riba caminda na Pos Chikito. Shete luna despues di e accidente, polis di trafico lo a entrega un rapport incompleto na Landsrecherche. Oktober aña pasa e mayornan di Zinnia a haya di compronde for di Ministerio Publico verbalmente cu e agente policial lo no wordo persigui, ni pa ta bou influencia di alcohol.
Sinembargo nunca nan a ricibi un carta cu for di cual e mayornan lo por bay corte di apelacion. Matos y Croes ta sospecha cu lo a comete foutnan den investigacion intencionalmente pa asina impedi cu Ministerio Publico lo persigui e polis cu a atropeya nan yiu penalmente.