Pòrtrèt: Raport Final EcoVision

WILLEMSTAD – 52 porshentu di e superfisie total di un zona grandi di ref di koral dilanti Holiday Beach Hotèl a sufri daño. Esaki a tuma lugá durante trabounan pa anker un barge di e kontratista prinsipal Bataafse Aannemings Maatschappij (BAM). “E koralnan grandi a sufri un impakto severo di 71 porshentu . A keda konstatá ku e ankernan i nan kabelnan a kòrta, fragmentá òf ranka e koralnan. Segun kalkulashon lo dura 17.5 aña pa e koralnan afektá bolbe desaroyá.”

Asina e rapòrt final di EcoVision Environmental Consultancy and Management ta konkluí despues di a analisá e plannan di anker suministrá pa BAM i e dañonan registrá den e área. E dañonan a keda kousá entre 15 pa 22 di aprel último durante e trabounan pa konstruí e di dos Megapir ku ta planiá pa keda kla dia shete di novèmber di e aña aki.

E ref di koral ku ta tabata eksepshonalmente bon desaroyá i ku hopi diversidat di espesienan a pèrdè hopi di su atrakshon. E dañonan konstatá ta repartí den dos zona, un zona chikitu di 400 meter kuadrá i un zona grandi di entre dos pa trinta meter di profundidat. Entre kuater pa dies meter di profundidat ta kaminda e balor di e kobertura di koral ta mas haltu.

Raport Final EcoVision

Impakto ekonómiko
Den su rapòrt EcoVision no a hasi un kalkulashon di e balor monetario di e impakto ekonómiko i a limitá su mes na usa e parameternan di Carmabi pa deskribí e impakto. Segun kalkulashon e área di impakto ta kubri un hèktar miéntras ku e proporshon di impakto riba koralnan ta entre 42 pa 52 porshentu. E periodo ku ta dura pa e ref di koral bolbe desaroyá ta tuma 17.5 aña di tempu.

No a kumpli ku pèrmit
E rapòrt di EcoVision ta konkluí mas aleu ku no a kumpli kompletamente ku tur e kondishonnan stipulá den e pèrmitnan ku a keda otorgá na Curaçao Ports Authority (CPA) pa konstrukshon di Megapir 2. Segun e kondishonnan stipulá uso di anker ta permití solamente den awanan ku ta mas profundo ku trinta meter. Tambe mester a usa un asina yamá ‘silt screen’ pa protehá e koralnan, lokual no tabata e kaso.

En total CPA ta disponé di tres pèrmit: un pèrmit di konstrukshon otorgá pa Ministerio di Tráfiko, Transporte i Planifikashon Urbano (VVRP), un pèrmit basá riba e Ordenansa Nashonal Marítimo otorgá pa VVRP i un eksonerashon basá riba e Ordenansa di Ref di Koral otorgá pa Ministerio di Salubridat Públiko, Medioambiente i Naturalesa (GMN).

Raport Final EcoVision

Fondo pa restourashon
Pa kompensá e dañonan EcoVision ta rekomendá dos método di kompensashon. E promé ta un kompensashon finansiero basá riba e balor ekonómiko total di e área. E di dos ta kreashon di un fondo pa restourashon di koralnan den e área afektá ku lo mester keda manehá pa Carmabi den koperashon ku operadornan lokal di buseo i un direktiva. E preferensia di EcoVision ta bai pa e di dos método esta kreashon di un fondo pa restourashon.