Pòrtrèt: Kees Broere

PHILIPSBURG/HILVERSUM – “Nos ta masha kontentu ku e marinirnan ku a manda aki, pero falta hopi mas di nan. Nos ta spera ku lo bini mas ayudo.” Esaki Marvio Cooks ta bisa for di Sint Maarten.

Huntu ku su famia el a buska refugio na Little Bay. Rònt di dje e ta mira hende sakeá, hopi di nan pa motibu di falta di kuminda, awa i akohida, pero tin di nan ta hisa aparato eléktriko nobo nobo tambe bai kuné. “Mester di mas vigilansha i mas mantenshon di òrdu.”

Prizòn
Evelien Henriquez-Dijkhoffz, ku na Sint Maarten den e bario Pointe Blanche ta mei mei di e estrago, ta spera ku lo bini mas militar. “Tin hopi kiebro, espesialmente den e área Pelican, ei mester di ayudo militar urgentemente.”

Den e mesun bario e prizòn di Sint Maarten, prizòn Pointe Blanche, ta keda. “E prizòn tin daño. Tin marinir ei pa vigilá, ke men mi ta trata di no pensa muchu riba esaki”, Evelien ta konta. Anshá e ta buska notisia tokante orkan Jose, ku ta un kategoria 4, i si e ta bini serka nan ei. Pa su alivio un stashon di radio ta den aire atrobe, pero e informashon ta keda skars.

“Mi a tende di mi ruman ku asta Rei ta bin pa duna sosten moral”, Marvio ta bisa. “Nos ta masha kontentu ku e sosten i e kosnan di Hulanda, pero hopi ta spera tambe ku lo aktua fuertemente kontra e sakeo i e kiebronan.”

Eveline tin idea pa meskos ku ora di Irma, e keda kas den un han serka su garashi ku ta di betòn harmá. “Kasi no tin shèlter. Laga hende ku a pèrdè tur kos haña lugá ei.” Ainda e dak di su kas tei pero hopi di su bisiñanan no tabatin e mesun suerte. E ta trata di drecha mas tantu ku e por, reforsá e kas mas ainda huntu ku su kasá i yuda otro hende. Tin bia e ta manda su yu hòmber bai mira konta ku e bisiñanan, di kua famianan den eksterior no a tende nada ainda.

“Akohida, seguridat i basta awa di bebe i sufisiente kuminda pa hende ta e prioridatnan ku defensa na Sint Maarten ta okupá kuné. Nos tin un renbak grandi i e ta yen. Por lo pronto nos tin awa. Kuminda sí lo bira un problema si no bini nada. For di un inventario serka nos konosínan a sali ku tin algun supermerkado ku no tabatin daño na nan frishidèr”, Eveline ta konta. “Esaki ke men ku pronto por entregá kos.”

‘Komunidat ta yuda otro’
Marvio ta bisa ku e drama na Sint Maarten ta trese hende serka otro tambe. “Hende ta den shòk, pero tambe gradisido ku nan ta na bida ainda i nan ta pará kla pa edifiká tur kos di nobo atrobe. Tur hende ta trata di yuda otro i por skonde serka otro den e próksimo tempestat.