Portrèt: Sam Jones

WEESP – Ora alkalde di Weesp djasabra a tende ku e protestadónan kontra Zwarte Piet na Dokkum ker a bini Weesp, el a deklará un òrdu di emergensia. Tòg tabatin un grupito chikí di demonstrante na Weesp kaba. E yu di Kòrsou Collin Schorea tabata un di nan i e ke demonstrá te na Kòrsou.

“Ata mama mira, Zwarte Piet!” Tur aña rònt di e tempu aki Collin mester tende meskos. “Bo a trese pepernoot?” Tur sorto di insinuashon ku pa Schorea, ku tin kolo skur, ta masha doloroso i ta hasié razu. “Mi tin gana di pasa un hende un bòftá!”

Mihó protestá
Tòg Schorea no ta hasi esaki, pero tur aña e ta bai demonstrá si. Por ehèmpel na Weesp. Pegá ku Amsterdam, kaminda kontrali na kapital tin kantidat di Zwarte Piet ta partisipá na yegada di San Nikolas.

Un multitut grandi a bin wak e aña aki tambe. Joyce Kiba ta kunsumí. El a lanta na Weesp komo yu di un tata blanku i un mama pretu. Dos aña pasá el a disidí di protestá. E promé aña su so.

“Henter e multitut a bira kontra mi”

“Aki mi tabata pará dos aña pasá. Riba Zwaantjesbrug”, Kiba ta mustra. “Mi so ku un bòrchi. Henter e multitut a bira kontra mi. Un polis a ranka e bòrchi for di den mi man.” E aña aki e ta para ku un grupo di un binti demonstrante.

Un kombersashon no ta posibel
Schorea, Kiba i e otro demonstrantenan ku ta bini di Amsterdam ta grita lema manera “Zwarte Piet t fèrdrit pretu!” Mayoria hende no ta reakshoná. Aki aya un hende ta hisa nan dede meimei òf ta grita “zeurpiet”, ta mustra ku dede riba nan frenta. E demonstrantenan ta para tras di un hèki i ta grita “Weesp, bergwensa. Hulanda, bergwensa.”

No ta bini un kombersashon ounke Schorea si lo ke esei. “Bo ta mira ku nan no konosé e doló ku nos tin.” Pakiko e no ta kuminsá un kòmbersashon anto? “Nos no tin pèrmit. Komo demonstrante polis ke pa bo keda tras di e hèki.”

“Djis un fiesta inosente”

Kiba a purba dos bia kaba pa “tene un diálogo ku rèspèt” na Weesp. E ke “un fiesta di San Nikolas inklusivo sin rasismo. Ke men sin Zwarte Piet.”

Un rasismo mas profundo
Segun Schorea i Kiba Zwarte Piet ta “un reflekshon di un rasismo mas profundo” i Zwarte Pietnan ku ta baila i hari alegre “tin un konekshon direkto ku e pasado di sklabitur di Hulanda”. E hendenan kant’i kaminda na Weesp ta hari. “Si, mi ta komprondé si. Pero esaki ta djis un fiesta inosente di mucha, ‘n ta bèrdè?”

Na desèmber Schorea ta bai Kòrsou bai protestá kontra Zwarte Piet. Net riba dia di su mes hasimentu di aña, 5 di desèmber: “Ridíkulo ku hende koló skur ta bai pinta nan kara mas skur ainda pa un fiesta rasista. Esaki mester para!”