Presidente di direktiva di Fundashon Duna Lus Eduard Eleonora – potrèt: Dulce Koopman
WILLEMSTAD – Tin indikashon ku e frumunan independiente lo no tin otro eskoho ku ta di drenta servisio di Fundashon Duna Lus, ku ta eksihí pa frumunan respetá e reglanan pa por funshoná den Kraamkliniek. Aktualmente tres di e seis frumunan na Kórsou, ta den servisio di Fundashon Duna Lus (Kraamkliniek) i tres ta traha independientemente.
E frumunan independiente ta pendiente di un veredikto final den e kaso ku nan a entamá kontra di Fundashon Duna Lus, relashoná ku e opheshonnan ku nan tin kontra dje kòntrakt ku e Fundashon ta ofresé nan pa drenta servisio.
Fundashon Duna Lus no ke mas pa e frumunan drenta sin regla i ehersé nan funshon den e klínika na Rio Canario. For di 2009, Kraamkliniek a pone e reglanan i purba di yega na un akuerdo ku e frumunan, sín éksito.
Fundashon Duna Lus a manda un karta pa e frumunan dos luna pasá ku e partisipashon ku esei ta último bia ku el a negoshá i e negoshashonnan a para. E frumunan a ninga di firma e akuerdo i nan a bai hues. Hues a duna un sentensia temporal.
Kraamkliniek tambe lo mester kumpli ku reglanan. “Entre otro nos mester perkurá pa un akomodashon i pa personal ku ta asistí e frumunan ta bon eduká”. Asina Eduard Eleonora a enfatisá.
Algun tempu pasá gobièrnu a disidí ku tur frumu nobo ku ke bai traha na Kraamkliniek, mester drenta servisio di Fundashon Duna Lus.Esaki ta krea posibilidat pa drecha e kalidat. Eleonora:” Mi ta kere esei ta un bon desishon di gobièrnu i di SVB. Ora bo ta profeshonal bo mester traha tambe na un kaminda profeshonal.”
7 di februari ora ku hues ta duna su veredikto final, e ta invitá Inspektor di Salu, Gersji Rodrigues, pa duna su punto di bista riba e kaso.
Outor Dulce Koopman