E abogadonan arubano Andin Bikker i Lincoln Gomez – potrèt: Pieter Hofmann
DEN HAAG – Por lo pronto lo no bini derechi di vota pa Tweede Kamer pa tur habitantenan mayor di edat di Reino ku nashonalidat hulandes. Konseho di Estado no a duna e abogado arubano Lincoln Gomes, ku a entamá un testcase, rason awe.
Hulandesnan mayor di edat di e paisnan karibense di Reino awor solamente tin derechi di vota pa elekshon di Tweede Kamer si nan a biba dies aña òf mas na Hulanda.
Prinsipio di igualdat
Segun Gomez ku esaki ta afektá e prinsipio di igualdat. Habitantenan di Hulanda Karibense (munisipio ekstraordinario for di 2010) si tin derechi di vota pa Tweede Kamer, pero tòg Hulanda Karibense tin un propio órden hurídiko, e abogado ta rasoná.
Gomes ta haña tambe ku mester konsiderá Konseho di Minister di Reino komo legisladó, pasobra Konseho di Minister di Reino ku un medida general di gobièrnu di Reino, mas i mas frekuente ta intervení profundamente den e órden hurídiko di e paisnan karibense di Reino. Si por a konsiderá Konseho di Minister komo legisladó, segun Gomez lo tabata lógiko si residente di Aruba ku nashonalidat hulandes tambe haña derechi di vota pa Tweede Kamer.
Raad van State ta ophetá ku Konseho di Minister mirando e outorisashonnan no ta legisladó. Votadónan arubano segun e Konseho tin sufisiente posibilidat pa ekspresá nan preferensha na Elekshonnan di Staten, i e minister plenipotensiario arubano na Den Haag por influenshá desishonnan.
Asuntunan di Reino
Tambe Konseho di Estado ta skibi ku tin tiki asuntu di reino kompará ku asuntu interno di e pais Hulanda. Segun nan lo ta bai muchu leu pa duna hende hulandes di e paisnan karibense un bos pa Tweede Kamer.
Dies aña pasá Konseho di Estado a husga meskos den un kaso igual. For di 10-10-’10 segun Gomes i su abogado-partner Andin Bikker (alabes miembro di Staten arubano) hopi a kambia konstitushonalmente, ta p’esei nan a disidí di purba di nobo.
‘Desapuntante’
E dos abogadonan ta yama e huisio ‘desapuntante’. Konseho di Estado segun e abogadonan a husga muchu lihé. Gomez i Bikker entre otro ta mustra riba e instalashon fòrsá di e kolegio di supervishon finansiero arubano (Caft).
“For di nos eksperensha nos a tene kuenta ku den kaso di tèst hopi bia bo mester sigui hiba kaso te den último instansha, pero nos a ferwagt sí un veredikto ku mas kontenido di Konseho di Estado. Nos lo hiba e kaso dilanti pa Korte oropeo di derecho humano.”
E ta spera ku lo bini klaridat pa e próksimo elekshonnan di tweede Kamer despues di esnan di mart 2017.
Outor Pieter Hofmann
