ORANJESTAD – “E problema na InselAira ta e planifikashon di e mantenshon. Nan a pone nan mes den un huki, di moda ku tur avion kasi pareu tabata na turno pa un mantenshon grandi.” Esei e eksperto di avion kanades Bryce Fisher ta bisa. A kontrat’é pa traha programanan di mantenshon pa e outoridat di aviashon kurasoleño CCAA.
Tòg Fisher ta bisa ku e departamento di mantenshon di e kompania aéreo ‘ta traha bon i ku e avionnan registrá na Kòrsou ta seif’. E inspekshon arubano di aviashon ainda mester bini ku nan konklushonnan tokante di esaki. “Aktualmente ta evaluá e departamento di mantenshon na Kòrsou”, asina e direktor di e inspekshon di aviashon arubano Edwin Kelly ta bisa.
Edwin Kelly ta papia ku Sharina Henriquez
E departamento di mantenshon a haña mal nòmber atrobe. E kabes di e departamento aki lo tabatin un bendementu di piesa di avion i a haña su retiro. InselAir ta ninga esaki.
Direktor di e inspekshon di aviashon arubano Edwin Kelly
Bendementu di piesa di avion
Djaluna e minister kurasoleño di Transport Suzy Camelia-Römer a pone dos inspektor di aviashon riba non-aktief. Esaki relashoná ku ‘rumornan’ ku nan lo ta pará riba lista di pago di salario di Insel i alabes nan tin kompania ku ta bende piesa di avion. CCAA ta bisa ku ta ministerio a tuma e desishon ei, i no e outoridat di aviashon kurasoleño mes.
E fundadó di InselAir Edward Heerenveen te ainda ta pará firme tras di su departamento di mantenshon. E ta bisa si ku for di dia ku 100 mion dòler a keda pegá na Venezuela pa motibu di e krísis den e pais ei, ta falta plaka serka Insel.
“Si bo no tin sufisiente plaka pa piesa, bo mester warda te ora bo tin nan. Paso sin nan bo no por bula. Bo mantenshon no por sufri bou di esaki. Si no por drecha un avion na tempu, e ta keda pará i bo ta haña retraso.”
Heerenveen ta bisa tambe ku Insel tabata trahando huntu ku un partner stratégiko pa pone e kompania riba su pia atrobe. “Nos lo no tabatin mester di gobièrnu si nos a logra haña e partner stratégiko na tempu.”
Miónes
Esaki segun e na final no a logra pasobra a tene e avionnan abou. Nan mester bai laira lihé, Heerenveen ta enfatisá.” Pasobra tur dia mi ta pèrdè miónes.”
Heerenveen tin masha gana di haña sa ta kiko ta e motibu ‘bèrdadero’ tras di e desishon di inspekshon aéreo arubano pa luna pasá tene kasi henter e flota arubano di InselAir na tera.
Segun Gerensia di Aviashon di Aruba despues di un kantidat di insidente tékniko na yanüari por a papia di un trènt. Gerensia a disidí di tene seis di e shete avionnan abou pa wak si tin un relashon, asina direktor di e inspekshon di aviashon arubano Edwin Kelly a bisa. Pero Heerenveen ta suponé ku tin un otro motibu. “Pero eseinan ta keda mi suposishonnan.”
‘No a kontrolá’
E echo ku konsulado merikano i djis despues gobièrnu hulandes a taha nan trahadónan di bula ku InselAir, segun Heerenveen no ta bisa nada tokante e seguridat òf mal mantenshon. “Ken a bisa Merka ku nos no ta seif? Nan no a kontrolá. Nan a tende di Aruba. Hulanda tambe a tende di Aruba.
“Awor nos tin e problema”, Heerenveen ta kontinuá. “Tin kosnan straño ta sosodé. Dos luna promé ku Merka bisa ku nos no ta seif, nan a tene un audit. Magnífiko, ‘zero findings’, sero. Anto awor di repente óut of the blue’ bo nota bon.”
