Portrèt: Elisa Koek

WILLEMSTAD – Pa e temporada di karnaval 2017, MEO i Departamentu di Salubridat Públiko, huntu ku Bentana di Informashon, a introdusí algun reglanan nobo pa sigurá higiena i salubridat den standnan ku ta bende kuminda i alkohòl riba ruta di Karnaval.

Ronnie Cornelus di Inspekshon Ekonómiko, a indiká ku standnan riba ruta di Karnaval no ta permití pa bende alkohòl na bòter ni ku menor di edat, pa sigurá siguridat i orden públiko, i a indiká ku lo tin kontrol severo riba esaki. Tambe e funshonario a enfatisá ku lo sera inmediatamente tur stand ku ta tur viola e reglanan.

Ronnie Cornelus i Wilferd Labordus ta papia ku Deya Mensche

Ronnie Cornelus di Inspekshon Ekonómiko & Wilferd Labordus. Potrèt: Deya Mensche

Pèrmit adishonal
Tambe a oumentá den e gastunan mará na e pèrmit, pasobra ta konsiderá Karnaval un aktividat spesial, kual ta rekerí un pèrmit adishonal, Cornelus a splika. Antes Kuerpo Polisial tabata guia e proseso di pèrmit, spesífikamente – Buro di Leinan Spesial – pero pa promé biaha MEO ta guia esaki huntu ku GGZ i Bentana di Informashon. Aproksimadamente 100 doño di stand a hasi petishon di pèrmit di benta riba ruta di Karnaval.

Wilferd Labordus – GGZ departamentu THZ – ta enkargá ku kontrol i higiena riba di karnaval i a splika kon importante ta pa kada trahadó di stand tin su karchi di GGD, unda nan a siña kon pa tene e kuminda na e temperatura korekto i den baki higiéniko, i tambe kon pa bisti apropiadamente pa trata ku kuminda.

Raisa Francisco. Potrèt: Deya Mensche

Muchu lat
Raisa Francisco, kende tin dos aña ku su stand ‘Sabor di Banda’bou’, a pidi pa gobièrnu sentralisá e proseso di pèrmit, paso doñonan di stand tin di kana un kaminda di krus pa yega na tur e permitnan. Iraida Alberto, ku ta para na sùr Gerardusweg bou di e palu di tamarein, tambe ta di opinion ku e proseso por ta mihó organisá. Según Alberto i Francisco, e splikashon di gobièrnu tabata hopi bon, pero muchu lat, kual a pone e doñonan di stand kore masha kabe’i gai pa ta kla ku e pèrmit na tempu pa e marchanan.

Tambe nan ta hopi malkontentu ku e 25 florin adishonal ku AGKK a introdusí, sin duna muchu splikashon dikon. “Promé nos tabata paga 10 florin i awó mester paga 85 florin, i awó e 25 florin akí tambe ta bin aserka, loke ta un abusu”, Alberto a deklará indigná. Cornelus di Inspekshon Ekonómiko di su banda ta atmití ku sierto kosnan no a bai según regla internamente, i MEO lo evaluá esaki pa e no ripití otro aña.

Si Alberto i Francisco a gaba e manera ku e kòntròl ta bai riba ruta, unda ku un tim di aproksimadamente 6 persona, ta ehersé e difísil trabou. “Si nos a tené nos mes na e reglanan di e pèrmit, e proseso i kontrol ta bai masha fásil i niun funshonario mester tuma medida kontra di bo”, Francisco splika.

Muchu molèster i muchu sèn
Tòg Francisco ta haña ku te ainda ta bale la pena pa bende kos riba ruta di karnaval. “Pero e gastunan di permiso no mester sigui oumentà tur aña, pa asina sofoká e hòmber chikí ku ta hasi esfuerso pa bai dilanti”, el a enfatisá. Pa Alberto si e proseso a bira muchu molèster i muchu sèn. “Mi ta duda ku despues di e aña akí lo a partisipá atrobe”, ela finalisá.