AMSTERDAM – Dos kandidato ku rais antiano so ta partisipá na elekshonnan di Tweede Kamer. Ku esaki e kantidat di antiano den polítika nashonal hulandes ta keda hopi atras kompará ku otro grupo étniko. Ademas no ta probabel ku un di nan lo bira miembro di Kamer.
Marianella Leito ta number 8 pa Artikel 1, Ixora Balootje ta di 44 pa ChristenUnie. E kurasoleñonan John Leerdam (PvdA) i Glenn Helberg (Artikel 1) ta riba lista si, pero komo lijstduwer (riba e último puesto).
Dosente universitario Liza Mügge (Universidat di Amsterdam)
Otro gruponan étniko ta pone nan mes kandidato pa Tweede Kamer mas frekuente. Liza Mügge, dosente na Universidat di Amsterdam a investigá diversidat den Tweede Kamer. For di 1986, ora a elegí e promé miembro di Tweede Kamer no blanku, a elegi 55 parlamentario ku un desendensia no oksidental. Sinku di nan so tabata di Antia, e ta konta.
“Mi mester duna e hulandesnan turko i marokano ‘credit’, Nan ta bai mihó”, Leerdam ta atmití.
Mugge: hende ta subi lista pasobra nan ta visibel den e debate públiko, i e ora ei tambe pa e direktivanan di e partidonan. Último añanan bo tabata mira mas hulandes turko i marokano pasobra e gruponan ei ta mas politisá. Nan tin un bida riku den organisashon i nan nètwèrknan ta estrecho. Antianonan kisas ta mas plamá
Patronchi di migrashon
Helberg, èkspresidente di OCaN (Overlegorgaan Caribische Nederlanders) ta splika e diferensha parsialmente for di migrashon. “Hopi antiano a bini aki pa studia, Sirkunstanshanan ta pone ku nan ta keda. Nan moda di pensa ta hopi dirigí riba : mi ta bai bèk.” Algun di esnan ku a bai bèk a resultá den polítika lokal, Helberg i Leerdam ta bisa.
Helberg: “Un otro grupo ta bini Hulanda pa un mihó bida. Na e islanan nan ta sinti ku polítika a laga nan na kaya, e sintimentu ei nan ta bini Hulanda kuné. E retórika aktual e ora ei no ta yuda.”
Deskonfiansa
Antropólogo Juan Carlos Goilo ta sospechá ku antianonan ta deskonfiá e sistema hulandes. “Si nos no por ni para di un fiesta di mucha diskriminatorio miéntras ku tin bia tin mucha surinameño i yu di Kòrsou ku tin miedu di bai skol, pakiko hende di desendensha karibense lo konfia e sistema ei? E sistema ta protehá nan?”
Tantu Helberg komo Leerdam ta haña ku mester trata e suprepresentashon di mandatario antiano sistemátikamente. Leerdam: “Ta ún kos pa gana un antiano riba lista, ma ta dos si nan keda i sigui krese.” Dies aña pasá el a tene masterclasses pa mandatario aspirante di desendensia karibense. “Algun di nan a resultá den polítika, ma nan no a keda. Despues ku mi a sali for di Tweede Kamer niun hende mas no a sigui.”
Talento hóben
Awor Leerdam a bira presidente di e ret di diversidat di PvdA i atrobe e ta bai trata di interesá talentonan hóben pa polítika. Tempu di e presidensia di OCaN di Helberg, a traha plannan paresido, huntu ku èks miembro di Tweede Kamer Cynthia Ortega-Martijn.