ORANJESTAD – Direktiva di Aviashon Aruba ta bisa ku ora di duna lisensia di bula na kompania di aviashon nobo na lo bai tene las kuenta tambe ku e edat di e flota.
“Avion bieu no ta insigur mésora. Pero ta un tendensia pa kumpra avion bieu barata pa bai bula ku nan, ku tur reto di esaki”, direktor di Aviashon Aruba Edwin Kelly ta bisa.
Edwin Kelly ta papia ku Sharina Henriquez
Mantenshon
Mas i mas e ta mira kompania di aviashon ta skohe pa avion bieu. “Esaki ta hopi barata ora bo kuminsá. Pero e avionnan ei mester di masha hopi mantenshon i esaki ke men gastu haltu di mantenshon. Avion nobo ta mas karu den kuminsamentu, pero ta kosta ménos den mantenshon. Ta importante pa studia esaki delantá i asina garantisá ku kos lo keda bai bon.”
Na Estádos Unídos, un di e paisnan ku e regulashon di mas severo den laira, tambe tin kompania grandi ta bula ku avion di 25, 30 aña bieu, e direktor ta atmití. “Komo direktiva nos ta wak e kos aki si i si bira berdaderamente ekstremo nos lo aktuá.”
Un di e avionnan MD di InselAir ku tin un promedio di 26 aña bieu
InselAir tambe ta bula ku avion bieu. E flota ku a tene abou na Aruba, tin un edat promedio di 26 aña. Anteriormente e eksperto kanades di avion Bryce Fisher, ku outoridat kurasoleño di aviashon CCAA a empleá, a bisa ku InselAir a pone su mes den huki, pasobra tur e avionnan tabata den nesesidat di un mantenshon grandi na e mesun momento. E kompania di aviashon ta rekonosé ku pa motibu di falta di plaka nan no por a kumpra e piesanan na tempu, loke tabatin konsekuensha pa e planifikashon di e mantenshon.
‘No diferensia’
Fundadó di InselAir Edward Heerenveen di otro banda ta haña ku ‘no ta hasi un dònder di diferensia’ sea bo skohe pa avion bieu òf nobo. “Si mi tuma un avion bieu mi sa kiko ta mi plan di mantenshon tambe. E ora e mi sa kuantu esaki ta kosta. A base di esaki mi ta traha un presupuesto. Si mi kumpra un avion nobo mi tin tiki gastu di mantenshon, ma mi tin mas gastu di lease si.”
Heerenveen ta bisa ku un avion di 30 aña ‘por ta mas nobo ku un di 5 aña’. “Ta trata di e piesanan. Tin piesa ku ta mará na tempu, eseinan bo no tin mag di usa pa mas ku 6 luna te un aña.”
Ta remarkabel ku ta menshoná su kompania di aviashon den relashon ku estafa ku piesa di avion. E hefe di e departamento di mantenshon, kende entretantu a haña òntslag, lo tabata envolví den esaki, meskos ku dos inspektor di CCAA ku a pone riba nòn aktif, pendiente di e investigashon.
Influensha
Eksperto di aviashon i fundadó di AVA Airlines Giovanni Atalita ta haña ku e tipo di avion ku e kompanianan ta skohe p’e sigur sigur tin influensha riba kontinuashon di nan eksistensia. “Tantu DAE komo InselAir a skohe pa MD i Fokker: tur dos avion ta traha pa kompanianan ku entretantu ta fayit. (McDonelDouglas Cororation i Fokker) i no ta modernisá nan. Avionnan manera Airbus òf Bombardier CRJ700 ta mas moderno i ta traha mas efisiente por ehèmpel ku korozin.