DEN HAAG – Tòg lo no pèrsigui e tres polisnan ku a sali liber den e kaso di Mitch Henriquez. Asina Korte na Den Haag a disidí awe. E famianan di Henriquez a trata di fòrsa persekushon via e prosedura di e asina yamá Artikel 12. Lo pèrsigui dos polis si den e kaso.
Tambe a rechasá un petishon pa pèrsigui tur sinku polis den e kaso aki pa e echo ku nan a laga e víktima atras den un estado ku e no por a yuda su kurpa. E tabata for di su konosementu e ora ei.Tòg ‘no a sali na kla si e sinku polisnan pa malu no a hasi sufisiente pa yuda e persona arestá’, asina korte ta skibi den un deklarashon.
Ku Mitch tabata for di su konosementu, segun Josien van de Poll, wes di prensa di Korte di Den Haag, no ke men ku e tabata den peliger mortal. “E polisnan no a eksperensiá esaki asina. ” Ta te ora numa ku por a prueba ku e polisnan si tabata sa, kisas korte lo a pèrsigui.
Gerald Roethof, abogado di e famianan di Mitch Henriquez, ta pensa diferente tokante esaki. “Ora a interogá e polisnan nan tabata sospechoso. Loke sospechosonan ta hasi generalmente ta pinta e kaso mas bunita posibel. Polisnan tin un deber di kuido tambe. E ora ei bo por bisa: nos no tabata sa, pero nos punto di bista ta: nan mester a sa.”
Siguiente pasonan
Awor ta kasi imposibel pa pèrsiguí e tres polisnan. Sí ta posibel segun korte ku ta trata di kondukta reprochabel segun derecho disiplinario i por pone Estado responsabel pa esaki. Roethof ta añadí ku e famianan kisas mester bai Korte Oropeo pa Derecho Humano.
Famianan i amigunan ta kana dilanti den un kaminata silensioso pa Mitch Henriquez na yüli 2015. Potrèt di archivo: John Samson
Richard Korver ku tambe ta yuda e famianan di Henriquez, den un deklarashon di prensa ta mustra ku Hulanda dos be kaba a haña reprocha despues ku personanan arestá a muri despues di violensia di polis. E polisnan sospechoso den e kaso Henriquez tabatin e oportunidat pa deliberá ku otro i esei so kaba ta violashon di derechi humano, Korver ta skibi.
Reakshonnan di famia
Korver ta laga sa ku e famia ta ‘hopi deskonsertá’ despues di e desishon di Korte pa no pèrsiguí e tres polisnan. Segun Roethof e desishon aki ta ‘e sla di mas duru for di dia ku Mitch Henriquez a fayesé pa e famianan.’
Na yüni di 2015 e arubano Mitch Henriquez a fayesé despues di un akto violente di polis. Di e sinku polisnan envolví den su aresto ta pèrsiguí dos. A posponé e kaso den korte pa mas despues.
