DEN HAAG – Konseho di minister di Reino ta duna Kòrsou un instrukshon. E organisashon di e elekshon di Staten binidero mester bini den man di gobernador Lucille George-Wout.
Gobernador por rekurí na servisionan di gobièrnu pa manehá e organisashon. Asina minister Ronald Plasterk (Relashonnan den Reino) a anunsiá awe despues di e reunion di Konseho di Minister.
Bon gobernashon
Gobièrnu di Reino den e instrukshon aki ta apelá na e garantia di bon gobernashon. Plasterk: “Esaki ta toka direktamente na interferimentu ku un elekshon legalmente konvoká. Esei ta loke tabata parse ta sosodé siman pasá. A menasá hende ku retiro di trabou si nan lo a organisá elekshon.” E mandatario ke men e trahadónan di ofisina supremo elektoral.
Willemstad e último simannan. Despues ku gabinete Koeiman a kai un mayoria nobo formá den Staten ker a para e elekshon ku a kaba di konvoká. Plasterk: “Si nan tambe ke tene elekshon no ta nada, ma nos ker a evitá ku kisas otro siman lo a introdusí mas kambio atrobe.”
E minister ta bisa ku ta ‘tristu’ ku mester di un instrukshon pa esaki. Ta promé bia ku Konseho di Minister di Reino ta intervení pa garantisá elekshon liber. Riba 28 di aprel Kòrsou lo skohe un parlamento nobo.
Prosedura
A manda e desishon di Konseho di Minister di Reino pa Konseho di Estado (RVS, Raad van State) pa aprobashon. Esaki ta un eksigensia legal. Probablemente RVS lo duna su akuerdo djaluna.