ORANJESTAD – E bishita di kuater dia di prinsesa Beatrix espesialmente a kontentá e organisashonnan arubano di naturalesa. Ta manera un empuhe na gobièrnu pa berdaderamente kuminsá trata mantenshon di naturalesa.
Esaki a sali entre otro for di un kombersashon ku Greg Peterson, presidente di e fundashon Arikok, ku te un poko tempu pasá tabata manehá e úniko parke di naturalesa protehá na Aruba. Awor Spaans Lagoen di 70 hèktar a bini aserka.
Djabièrnè e prinsesa, ku ta dama protektor di Dutch Caribbean Nature Alliance (DCNA) ku Arikok ta miembro di dje, a pasa e área di naturalesa nobo aki seremonialmente pa e fundashon. Tambe tin un akuerdo di prinsipio ku gobièrnu arubano pa pasa diessinku área di naturalesa mas.
Esaki ta hopi nesesario pasobra naturalesa na Aruba tin desenanan di aña kaba bou di preshon di konstrukshon, espesialmente pa turismo. Banda di esaki gobièrnu apénas tabata traha na protekshon. Último 8 aña bou di gabinete Eman ‘berdè’ tabata e punto grandi, pero den práktika e isla no tabata bira mashá mas bèrdè.
Peterson ta konfirmá esaki. “Ora di pensa bèrdè a wak espesialmente e desaroyonan di energia alternativo. Un desaroyo bunita, pero e no ta shen porshento bèrdè. Esaki nos ta yama shinishi. E NGOnan solamente a añadí e elemento bèrdè. Esaki a kosta hopi trabou, Tabatin kaso den korte.”
“Pero’, Peterson ta bisa, “awor tin algun minister ku ta djòin e relato. Ku e sirkulo di energia alternativo huntu ku naturalesa Aruba ta bira basta mas bèrdè.” Prinsesa Beatris a hunga un papel importante pa trese e NGOnan i gobièrnu mas serka di otro, Peterson ta bisa. “Si nos prinsesa-mama papia, nos tin e inklinashon di skucha masha bon.”
E pasamentu di Spaans Lagoen pa fundashon Arikok den presensia di prinsesa Beatris. Potrèt: Sharina Henriquez
Na e reservashon di para Bubali Plas tambe e prinsesa ta hasi un bishita. Peterson komo presidente di e asosiashon di para Aruba Bird Life Conservation a entamá sinku kaso kontra gobièrnu pa para e plannan pa konstrukshon turístiko. E bon notisia segun e ta ku gobièrnu a primintí pa huntu ku invershonista wak si nan por kontinuá nan plannan di konstrukshon otro kaminda.
Turismo di Jekyll i Hyde
Riba e tore di mira para e ta konta e prinsesa e ‘historia di Jekyll i Hyde’. Ku esaki e ke men e dos karanan di turismo: prosperidat pero tambe daño na e isla. Pa kada shen trabou mester buska 93 trahadó djafó. Den kurso di añanan nan ta trese tres famia èkstra. Poblashon den 25 aña a krese bai di 60 mil pa 110 mil. “Tur e hendenan nobo aki tambe mester bira siudadano. Esaki ta kosta tereno, naturalesa, yen di kos.”