WILLEMSTAD – E intervenshon di Gobièrnu di Reino pa elekshon di 28 di aprel awor, kai bou di gobernador ta un bèrgwensa pa nos pais. Pero e tabata inevitabel. Eks promé minister di Kòrsou, Stanley Betrian ta konkluí for dje situashon aki ku tantu Gobernador, ku a ninga di firma e landsbesluit ku tabata destiná pa elekshon lo no a sigui, komo tambe Gobièrnu di Reino a haña ku esei ta en pugna di nos leinan.
Ta p’esei pa salbaguardiá un proseso trankil i bon di elekshon, a disidí pa mihó pone bou di Gobernador. ‘E ora ei bo sa sigur ku e kosnan ta bai manera nan mester bai, i pa e elekshon ta bon i eksitoso’. Despues ku Gobièrnu a disolvé Parlamento i miembronan di e gabinete a tuma retiro i ku a bin un gabinete interino, Gobernador a duna instrukshon pa entre otro atendé elekshon. Pero promé minister Gilmar Pisas a anunsiá ku elekshon no ta sigui, miéntras ku ta tin un landsbelsuit firmá ku ta bisa ku tin elekshon. E landsbesluit ei a bira parti di lei nan vigente ku ta konta pa tur hende sin eksepshon.
‘Ki ora ku bo haña intervenshon di Gobièrnu di Reino den nos asuntunan lokal e ta un bèrgwensa i ohalá e no pasa mas. Pero nos tur a mira aworakí ku básikamente no tabatin otro solushon, pasobra e Gobièrnu interino no tabata ke pa e elekshonnan sigui’. Asina Stanley Betrian a splika.
E partisipashon di Gobièrnu despues ku elekshonnan ta sigui tòg, no tabata sufisiente pa Reino. Tuma na konsiderashon tur e kosnan ku a pasa i ku 24 ora promé, ta bisa elekshon no ta sigui pa despues tuma otro desishon i drai bèk 360 grado disidí ku elekshon ta sigui tòg, no tabata sufisiente pa Gobièrnu di Reino tin konfiansa ku elekshon ta kana bon.
Stanley Betrian
Komprondé
Stanley Betrian ta konvensí ku no ta tur hende den nos komunidat ta komprondé e intervenshon di Hulanda. Esei ta pasobra tin basta hende ku no tin konosementu di nos lei i reglanan. Ta rekomendabel pa riba término kòrtiku i largu, hasi algu na e situashon aki. Entre otro pa medio di programanan informativo i atenshon pa materia di reglanan di estado i importansha di konosementu di nos norma i balornan na skolnan.
Betrian ta sugirí: “Siña e muchanan kiko ta nos norma i balornan i kon mester atendé ku otro den nos komunidat chikí di 150 mil hende kaminda tur hende konosé otro . I kaminda mester tin kontrol kontinuo.”
Konfiansa
Stanley Betrian no tin konfiansa ku for di awor en adelante tur kos lo bai nèchi. “Mirando e diferensianan di opinion ku tin, mi ta spera ku despues di elekshon ta pone pleister riba e heridanan, pero ku nan ta sera lihé, esei si mi no sa”.
