WILLEMSTAD – “Ta un bèrgwensa ku djabièrnè awor lo tene elekshon bou di supervishon di gobernador.”Asina Gilbert Cijntje, analista polítiko, ta bisa. E ta puntra su mes ‘ta kon por a yega asina leu ku Hulanda su influensha.” Èks promé minister di e gobièrnu interino despues di gabinete Schotte na 2012, Stanley Betrian, tambe ta yama e intervenshon di Gobièrnu di Reino “un bèrgwensa pa nos pais”. Pero segun e no tabatin un otro solushon.
Konseho di minister di Reino pa medio di un instrukshon a duna gobernador di Kòrsou e outorisashon di supervisá si e elekshon di djabièrnè awó na Kòrsou lo bai honestamente. Den e Konseho aki hopi bia Hulanda su voto ta desisivo. E instrukshon a bini despues ku e gobièrnu interino aktual di Gilmar Pisas a anunsiá ku lo kanselá elekshon, pa despues tòg bisa ku e ta sigui atrobe.
Gilbert Cijntje ta papia Dulce Martiszoon
Diferensha di opinion
“Asina Gobièrnu di Reino mester intervení den nos asuntunan lokal, esaki ta un bèrgwensa i laga nos spera ku esaki lo no sosodé mas”, Betrian ta bisa. “Pero pa garantisá ku e elekshon lo ta bon i trankil, esaki ta e solushon di mas mihó.” Betrian no tin muchu konfiansa ku for di awor tur kos lo kore na un manera desente. “Si mi wak e diferenshanan di opinion ku tin, mi ta spera ku despues di elekshon lo pega pleister riba e heridanan, pero si e heridanan lo kura lihé, esei si mi no sa.”
Gilbert Cijntje. Pòrtrèt: Dulce Martiszoon
Cijntje ta pensa ku despues di elekshon, ken ku gana mes, Kòrsou lo no a skapa e krísis ku e t’aden. Si no bini unidat bou di e partidonan polítiko, e sirkunstanshanan lo no kambia na Kòrsou: “Mi tin ku bisa ku aktualmente mi no ta mira e unidat ei surgi.”Si e partidonan di oposishon manera PAR, MAN i PNP haña poder, segun Cijntje lo bini medida pa restrukturá, revisá e finansanan i duna un empuhe na ekonomia atrobe. Pero sierto forma di pobresa, ku ta e resultado di problemanan den edukashon, desempleo, edukashon di skol defisiente, òf skarsedat di kas, segun e “lo no kambia.”
Desunion
Cijntje ta ferwagt ku, si e aktual gobièrnu interino bou di mando di MFK keda na poder, lo bini un maneho ku maksimalmente lo sirbi e interesnan di término kòrtiku di komunidat. Lo no tene kuenta ku e término largu. Ademas Hulanda segun Cijntje lo intervení regularmente: “Gobièrnu hulandes lo defendé su interesnan.”
Dos grupo ekonómiko ta pará direktamente kontra otro, segun Cijntje. “Esun grupo ta representá pa agrupashonnan di e sektor finansiero, hóreka i turismo, ku lo atraé hopi komersiante for di Hulanda.” Segun Cijntje tin gruponan grandi di kontratista hulandes den nan. “Esaki ta un di e gruponan di mas dominante den nos pais ku tin bon laso ku “Hulanda” òf mihó bisá polítika di Den Haag.” E grupo aki segun Cijntje ta para kontra di e grupo ku ta konsistí mas tantu di negoshante lokal chikí. Nan ta konektá ku otro agrupashon polítiko. “Kòrsou ta partí pa motibu di interesnan ekonómiko.” E interesnan di pueblo segun e ta hopi supordiná na esaki.
