WILLEMSTAD – Desempleo hubenil for di 2005 no tabata asina haltu. Kasi 40 porshento di hóbennan entre 15 i 25 aña no tabata traha na 2016, a sali for di sifranan di CBS.
Segun kriminólogo Simone van der Zee desempleo por hunga un papel den e kambio pa un bida kriminal. “E enfoke di esaki, no solamente ta serka Hustisia, sino bon mirá na tur ministerio. Desigualdat den entrada, oportunidat, baimentu atras di ekonomia, pero tambe Kòrsou su posishon den un área kaminda tin hopi organisashon kriminal aktivo, tur ta hunga un papel den e oumento di kriminalidat.”
Tòg ta bai hopi mihó ku kuminsamentu di e siglo aki. Un fondo den tantu kriminalidat komo desempleo tabatin na 2004/2005. Desempleo hubenil tabata 44 porshento i tabatin kasi 1100 atrako. A mata 40 hende i asina Kòrsou tabata na kabes den área karibense.
‘No tin perspektiva’
Faber den e investigashon ‘Misdaad op Curaçao en Bonaire’ (Kriminalidat na Kòrsou iBoneiru) (Faber e.a. 2009) ta bisa ku e tempu ei tabata espesialmente kulpa di e gulidónan di bolita. Míles di yu di Kòrsou, espesialmente hóbennan, tabata envolví direktamente òf indirektamente den kontrabanda. Desempleo hubenil a hunga un papel importante. “No pasobra desempleo riba su mes ta pusha hende den kriminalidat, pero por ta sí e falta total di perspektiva”, e investigashon ta bisa.
Anton Weenink den su investigashon ‘Geen reden tot moedeloosheid, De ontwikkeling van de criminaliteit op Curaçao (No tin nodi di deseperá, desaroyo di kriminalidat na Kòrsou) (2009) ta menta e poseshon ilegal di arma bou di hubentut: “Ta resultá ku atrakadónan hóben no solamente ta menasá, sino ta tira lihé tambe. Registrashon i kòntròl riba poseshon di arma ta laga hopi di deseá.”
Den e añanan promé ku 2010 a bini un kambio. E desempleo hubenil a baha te 5 porshento na 2008 i e kantidat di atrako te 400 pa aña. Faber ta duna falta na e medidanan mas skèrpi na aeropuertonan, Último añanan e kantidat di krímen ta subi un tiki atrobe. E kantidat di atrako ya pa añanan ta rònt di 600. E desempleo for di 2010 ta subi ku un oumento di sigur 7 porshento na 2016.
Falta
Segun Christ van Dinteren, komandante na milisia di Kòrsou e kousa di kriminalidat hubenil ta den diferente área: ta un falta total di oportunidat. “Fallta di amor, protekshon, seguridat i plaka. Si nan haña un di e aspektonan aki den e sirkuito kriminal, e kos ta bai malu.
E falta di tata tambe ta hunga un papel. “No tin tata, mama mester traha i wela ta trata di kria e yu. Te dia e yu yega un edat ku e papelnan ta bòltu: e yu mester pèrkurá pa sèn pa henter e famia. Si no tin trabou pe anto e ora ei ta na mal òrdu lo e hasi esaki”, Van Dinteren ta bisa.
Van der Zee tambe ta menshoná e falta di tata. “For di investigashon a sali ku kresementu sin tata ta un hèndikèp grandi pa logra algu.”
Desigualdat
Desempleo òf pobresa riba nan mes, segun Van der Zee, no ta kousa kriminalidat: ta e desigualdat ku esaki ta trese kuné ku ta trese problema.