ALMERE – Tin hopi talento pa natashon na Kòrsou, pero lo keda sin usa esaki, si gobièrnu no invertí mas den deporte lihé. Asina e kampion olímpiko i eks-landadó Enith Brigitha ta bisa. E tin miedu ku e deporte di natashon lo bira un ‘deporte elitario’ riba su isla natal.
Brigitha mes a gana no menos ku 21 título hulandes den añanan ’70 i e tabata e promé landadó muhé di koló ku a gana medayanan olímpiko. Resientemente su biografia ‘Zwemmen in de Schaduw van Doping’ (Landando den Sombra di Doping) a aparesé, ku den dje un konfeshon tokante doping di su rival di Alemania Oriental, Kornelia Ender.
Tòp inalkansabel
Kosnan no tabata fásil pa Brigitha finansieramente, e ta konta. “Mi mama tabata su so ku sinku mucha i e mester a paga hopi sèn. Un pas pa drenta pisina tabata kosta fásilmente 400 florin pa aña i esei tabata masha hopi plaka e tempu ei. Anto ainda bo tin bo pañanan i, kaminda na Hulanda bo ta biaha ku trein pa un otro munisipio pa partisipá na e kompetensianan mas grandi, mashá lihé bo ta hañá ‘bo ta kue avion riba un isla. Esei ta kosta algu.”
E deporte di natashon a krese na Kòrsou i Aruba, Brigitha ta mira. E eks-landadó ta spera ku e gobièrnunan lokal lo invertí sèn adishonal pa e generashon hoben di deportistanan di natashon. Si esei no sosodé, Brigitha ta teme ‘ku deporte di natashon for di Karibe lo no alkansá e tòp hamas’.
| Oro pèrdí pa doping di otro
Na aña 1976 Brigitha a landa kontra Kornelia Ender na e Weganan Olímpiko na Montriòl. Riba 100 meter estilo liber, Brigitha a haña medaya di bròns; e medayanan di plata i di oro a bai pa dos landadó di Alemania Oriental. Algun aña despues a resultá ku e alemannan oriental a usa doping i ku en realidat ta Brigitha mester a haña e medaya di oro. Lo e no haña esaki nunka, tampoko ku forsa retroaktivo. “E Komité Olímpiko Internashonal a bisa ku a dura muchu tempu, ku e kaso a kaduká”, Brigitha ta konta. E ta konformá su mes: “Mi a sera e kapítulo ei.” Por sierto, Brigitha tin bastante otro distinshon riba su nòmber. Na 1973 i 1974 el a sali Deportista Muhé di aña. Na 1979 a kondekor’ é komo Ridder in de Orde van Oranje-Nassau. I den 2015 el a haña un lugá den e ‘Swimming Hall of Fame’. E no a risibí e medaya di oro, pero ta honr’ é si, pa su prestashon. |
