SCHIPHOL – “E kastigu ta muchu poko. Mi no ta niun tiki satisfecho.” Esei ta e reakshon di e mama di Mitch Henriquez riba e sentensia di wes. Esaki djaweps a duna e dos polisnan ku tabata envolví den e detenshon violente i e morto di su yu hòmber, un kastigu di prizòn di seis luna kondishonal.
Primu Alex Dijkhof tambe tabata serka e sentensia. Mitch tabata manera un ruman pa Alex. Na su kas na Den Haag Alex a pone un kamber spesial p’e, e ‘Mitch Room’. Un kamber kaminda na bida Mitch tabata keda ora ku e tabata na Hulanda.
Wes ta konsiderá ku tin prueba ku e polisnan a maltratá Henriquez i ku e arubano a fayesé di e violensia ku por lo demas tabata permití. Pero e uso di violensia a bai muchu leu. E ‘nekklem’ fuerte ku a wanta muchu largu segun korte, ‘den kombinashon si òf nò ku un situashon di eksitashon’ a kousa morto di Henriquez.
Ni un dia será
Abogado Korver ta enfatisá ku ta un kastigu kondishonal e dos polisnan sentensiá a haña. “Ke men nan no ta bai será ni un dia. Miéntras ku sí ta tene nan responsabel pa morto di un hende, ku sí nan a usa violensia ilegal, ku sí nan a hasi esaki nan dos huntu i ku morto komo konsekuensha.” E ta kontemplá pa meskos ku su kolega Gerald Roethof e bai Korte Oropeo di Derecho Humano.
“Gobièrnu arubano mester mustra Hulanda ku nan no ta haña ku ta OK kon ta trata arubano na Hulanda.” Esaki Richard Korver, abogado di e famianan di e arubano Mitch Henriquez ta bisa. Korver ta kontemplá di bai Korte Oropeo pa Derecho Humano.
E abogado a bisa esaki despues di e kaso penal kontra dos polis ku tabata envolví den e detenshon i morto di Mitch Henriquez dos aña pasá.
Abogado Korver
E dos polisnan, kende nan nòmber no ta divulgá, kada un a haña un sentensia kondishonal di seis luna. Wes ta konsiderá ku ta probá ku nan a maltratá Henriquez i ku e arubano a muri di e violensia ku por lo demas ta pèrmití. Pero e uso di e violensia ei a bai muchu leu. E ‘nekklem’ ku hopi forsa, ku a wanta muchu largu, segun korte ‘sea den kombinashon ku un situashon di eksitashon òf laga’, tabata e kousa di Henriquez su morto.
Den un kaso komparabel tabatin kastigu mas severo
Abogado Roethof, ku tambe ta representá e famianan di Mitch Henriquez, tambe ta kontemplá pa bai Korte Oropeo. “Korte Oropeo den un kaso komparabel kontra polis, no a haña dos aña sufisiente. Ademas e polisnan no por a keda ku nan trabou”, kontrali na e polisnan ku ta dilanti wes den e kaso di Henriquez.
Ainda no sa ki dia e abogadonan lo tuma akshon. Promé nan ke investigá e sentensia di wes.
