Pòrtrèt: Gijs van den Heuvel

KRALENDIJK – E trahadónan na e terminal di zeta Bonaire Petroleum Company (BOPEC) na Boneiru awe mainta a sera e terminal. Nan a blòkiá e porta ku un kadena i outo, pasobra nan ke klaridat tokante nan futuro. “Si nos no tende nada konkreto nos ta keda para aki te djabièrnè”, presidente Gabriel Pourier di e sindikato BPWU ta bisa.

Djabièrnè e ultimátùm di Inspekshon Área di Biba i Transpòrt (ILT, Inspectie Leefomgeving en Transport) ta kaduká. Bopec promé ku djabièrnè mester prueba ku e ta disponé di 20 mion dòler, pa e renobashon di e terminal por kontinuá. Sino mester hasi e tankinan i pipanan bashí.

Na e hèki di Bopec tin bòrchi di protesta ku ta animá Hulanda, Venezuela i Estádos Unídos pa no bandoná e kompania i e trahadónan. Ta direktiva so ta riba e tereno, segun Pourier pa deliberá ku e doño venesolano PdVSA i gezaghèber.

No tin koriente
Bopec ta suministrá fuel oil na e sentral di energia di ContourGlobal. E suministrashon aki pa motibu di e akshon a para ‘te ora tin bon nobo’. P’esei pa motibu di e wèlga koriente por bai, i asina henter bida públiko lo para. Pourier ta kere ku e sentral por keda traha te mayan riba e stòk presente.

E instalashonnan ta den mal kondishon pa motibu di falta di mantenshon añanan largu. E plan di drechamentu ku a kuminsá na 2016 a para pa falta di plaka. E problemanan a bira agudo pa motibu di e sanshonnan di e presidente merikano Donald Trump kontra Venezuela. P’esei PdVSA no por manda suma di plaka grandi mas pa eksterior.

Lider di sindikato Gabriel Pourier di BPWU. Potrèt: Gijs van den Heuvel

Direktiva di BOPEC konstantemente ta positivo si, pero BPWU ta pèrdè pasenshi awor ku e deadline ta aserkando i ainda no tin nobo konkreto. “Nos ke pa Hulanda duna nos un tiki mas tempu pa haña e sèn.” Pasobra segun Pourier e sèn t’ei si, pero mester buska un manera pa tres’é Boneiru.

Un di e trahadónan ku ta wèlga ta haña e medida di ILT masha eksaherá. “E produktonan ku nos ta haña aki no ta niun tiki peligroso. Bo por sende un lusafè tira aden sin ku nada sosodé. Nos no tin gasolin aki, ku eksepshon pa nos mes outonan. E zeta pisá kasi no por pega na kandela.” E ta atmití ku ora di lèkmentu por tin daño na medio ambiente. “Pero nos ta trahando riba mantenshon kaba i nos mester haña e chèns pa kaba esaki.”

Tanten ta laga e aktivistanan na pas. No tin polis presente. BPWU a pone gezaghèber Edison Reina na altura di e akshon, pero e no a reakshoná ainda. Representante di Reino suplente Jan Helmond ta bisa ku e no por hasi nada, pasobra ta un asuntu di e isla.

Trahadónan riba kaya
Ora será Bopec tin e menasa di retiru pa 110 trahadó, Pourier ta bisa. Henter ora nos ta tende ku tin un plan B, pero esei ta solamente pa ContourGlobal. No tin plan B pa trahadó i otro hende ku ta dependé di Bopec.” Segun e sindikato ta trata di 350 hende.