Pòrtrèt: Gijs van den Heuvel

KRALENDIJK – Por lo pronto ta produsí sufisiente koriente atrobe na Boneiru: e trahadónan di e terminal di zeta Bopec a kuminsá traha atrobe ayera nochi. Esaki a sosodé despues di e promesa di doño PdVSA ku e trahadónan por tene nan trabou asta si tanten lo mester sera e terminal.

Banda di esaki e sindikato BPWU a haña e siguransa di gezaghèber Edison Rijna i Representante di Reino suplente Jan Helmond ku lo hasi tur loke ta posibel pa tene e kompania habri.

‘Pasenshi’
Den un karta na idioma spañó na e trahadónan general manager Fabiola Claudia Baez ta skibi ku na nòmber di Bopec i e kompania venesolano estatal di zeta PdVSA e ta garantisá nan trabou i nan salario. Ademas e ta pidi nan tene pasenshi i mantené fe den futuro di Bopec, ‘e miho kompania di Boneiru i di PdVSA’.

Pa presidente Gabriel Pourier di e sindikato BPWU esaki tabata sufisiente pa pidi su miembronan bai traha atrobe. E motibunan prinsipal pa e akshon tabata miedu di retiro di e 110 trahadónan, i ku PdVSA no a laga tende nada mas for di kuminsamentu di desèmber ora ku Inspekshon di Ambiente di Biba i Transpòrt (ILT, Inspectie Leefomgeving en Transport) a pone un ultimatùm pa garantianan finansiero pa e mantenshon grandi di e instalashonnan bieu i peligroso. E deadline aki ta vense djabièrnè. “Si nos no tende nada nos ta keda para te djabièrnè”, Pourier a bisa ayera.

Despues ku e trahadónan a blòkia e porta djamars meinta trempan e sentral di energia di ContourGlobal no tabata haña kombustibel mas, ku lo a pone ku probablemente awe mes ContourGlobal lo no tabatin sufisiente produkshon di koriente. E peliger aki a kita.

Gezaghèber Rijna ayera tardi despues di deliberashon ku BPWU a klarifiká ku for di su responsabilidat pa òrdu públiko lo el a fòrsa e trahadónan via un kaso sumario òf un òrdu di emergensia pa kuminsá ku e suministro di kombustibel na ContourGlobal atrobe.

Den Haag
E delegashon di e sindikato a tende serka e Representante di Reino suplente Helmond ku diferente ministerio na Den Haag huntu ku gezaghèber ta hasiendo esfuerso pa mantené Bopec. Na desèmber a lanta un task force ku ta traha na un solushon tantu pa término kòrtiku komo pa término largu.

Ta remarkabel ku tantu den e karta di PdVSA komo den e deklarashon di gezaghèber no ta papia di un posibel solushon ku garantia finansiero. Si djabièrnè no tin siguransa tokante e 20 mion dòler nesesario, riba òrdu di ILT mester hasi e instalashonnan di Bopec bashí promé ku 1 di febrüari.