WILLEMSTAD – Inspirá pa e ‘nesesidat pa skol spesífiko pa mucha ku afektashon di spektro di outismo (ASS, Autisme Spectrum Stoornissen)’, mayornan a lanta e promé skol pa alumnonan ASS na Kòrsou.
Donna van der Dijs ta ko-fundadó di e skol i e ta mama di Sofia ku tin outismo. “Pa kada alumno nos ta traha un plan di enseñansa individual, pa asina nan haña enseñansa spesialisá i e atenshon adekuá.”
Uniue Learning Center ainda ta un skol privá. E espektativa ta ku den futuro e skol lo haña supsidio di gobièrnu. Esaki mester hasi posibel pa yu di mayor ku no por paga e plaka di skol mensual di míles di florin, tambe haña lugá.
Aktualmente tin ocho alumno na e skol. “Segun sifra na merka un den 67 mucha ta outista. Esaki ta konta pa Kòrsou tambe”, Alexandra Stolz, supdirektor di e skol ta bisa.
Alexandra Stolz i Donna van der Dijs, tur dos ta mayor i fundadó di e skol. Potrèt Dulce Koopman
“Nos ta kere, i tin prueba tambe, ku hopi outista por partisipá na un skol regular”, Stols ta bisa. “Tin mucha ku ta keda atras, pero nan mayornan no tin otro opshon. Ademas tin e grupo di mayor ku ta ninga di aseptá ku nan yu ta outista, i nan no ke kita nan di skol regular.”
Segun Stolz tin mayor tambe ku no sa ku algu na nan yu ta diferente i no ta realisá ku e muchanan aki mihó por bai un skol spesial.
Gastu
E lantamentu di Unique Learning Center Curaçao, loke a kosta mas ku shen mil florin, pa un gran parti su finansiamentu ta bini di e instansha di kuido Savaanhuis. Banda di esaki donashonnan di diferente kompania lokal i instansha a kontribuí na e realisashon di e proyekto.
E Asosiashon di mayor ta kontentu ku e lantamentu di e skol nobo. E asosiashon for di prinsipio a kontribuí na e proyekto, Vinod Diswani, presidente di e asosiashon ta konta.
Aktualmente e skol tin ocho alumno.
‘Stepping Stone’
“E mester a bini masha dia, ma nos ta konsider’é un stepping stone, Daswani ta bisa. Ta e aspekto finansiero ta prekupá Diswani ainda. Pa motibu di falta di sufisiente medio finansiero, tin mucha outista ku ta bini na remarke ku no por haña lugá na e skol ainda.
Segun un estimashon di Daswani tin mas ku tresshen outista na Kòrsou. Nan ta partí riba diferente skol i instansha. No ta tur ora nan ta resultá na e lugá kaminda nan por haña e enseñansa adekuá: “si por a pone mayoria di e muchanan outista na e skol aki, e gastunan lo baha i e plaka di skol lo bira pagabel”, Daswani ta pensa.
Enseñansa adekuá
Daswani ta spera ku e skol lo keda risibí e atenshon nesesario di gobièrnu. Ta tarea di gobièrnu porfin di pèrkurá pa enseñansa adekuá pa tur mucha den komunidat.” Komo sosten e asosiashon ta manda informashon tokante e skol pa e mayornan ku por tin benefisio di esaki.
