KRALENDIJK – Grandinan na Boneiru mester por biba riba nan mes mas largu posibel, segun sekretario di estado Paul Blokhuis di Salubridat Públiko, Bienestar i Deporte (‘VWS’). Esei e mandatario a bisa durante su bishita na e isla pa sera konosí.
Lo pone sèn disponibel pa un proyekto pa adaptá bibienda pa e grandinan. Blokhuis ta haña ku ta nesesario pa amplia e kuido na Boneiru pa grandinan, hendenan ku handicap i hende muhé hoben.
“Nos tabata den Rincon. Ei tin hopi hende grandi ta biba i tin un nesesidat kresiente pa kuido di pasa dia. Na Boneiru tambe soledat ta un fenómeno ku ta surgiendo, ku nos tin ku kombatí. E grandinan i esnan ku handicap mester sigui partisipá. Esei ta mi lema na Hulanda tambe: tur hende mester por partisipá.”
‘Na Boneiru tambe soledat ta un fenómeno ku ta surgiendo’ – Blokhuis
Prevenshon mester haña mas atenshon den e sektor di kuido i p’esei Blokhuis ke stimulá un estilo di bida salú na Boneiru tambe.
Palabrashon ku Boneiru
Na Hulanda europeo e kabinete ta trahando na un Akuerdo Nashonal pa Prevenshon ku palabrashonnan pa baha humamentu, sobrepeso (obesitas) i abusu di alkohòl. E sekretario di estado ke hasi palabrashonnan ku Boneiru tambe riba e puntonan di lansa ei: “Mester logra avanse den esei ainda, tantu na Hulanda europeo komo na Hulanda karibense.”
E punto di salida ta ku, ku un estilo di bida salú por evitá hopi problema i gastu di kuido. “Mi a reta esnan konserní pa bini ku ideanan konkreto riba un òf dos di e temanan akí.” Gustosamente Blokhuis ke mira nan plannan banda di temporada di fakansi di verano.
Sekretario di Estado Blokhuis ke amplia kuido den institushonnan pa e grandinan. Ta trahando na esaki kaba, na Villa Antonia. Potrèt: Gijs van den Heuvel
Kombatimentu di pobresa mesun importante
Gezaghebber Edison Rijna a bisa ku sigur e Kolegio Ehekutivo ke kolaborá pa un akuerdo pa prevenshon: “Prevení ta mihó ku kura.” El a añadí sí ku kombatimentu di pobresa tambe ta importante sigur den e esfuerso pa un estilo di bida salú. “Esei no ta e kartera di Blokhuis. Pero si hende no por paga pa bèrdura i fruta, tur kos ta keda na bon intenshon.”
Sekretario di Estado Blokhuis i gezaghebber Rijna riba e importansha di prevenshon den kuido na Boneiru. E akuerdo pa prevenshon no ta nifiká ku otro problemanan grandi na Boneiru, manera entre otro, violensha doméstiko i maltrato di mucha, lo kai atras. Blokhuis: “Hopi biaha ta un tabú, peru tur hende ta konvensí ku nos mester pone man na obra den e área ei.” E profeshonalnan den kuido pa hoben tin un plan di akshon p’esaki kaba.
Medionan disponibel
“Mester hasi lihé ku esaki i mester pone medionan disponibel pa atendé esei na un manera kreibel. Awor nos mester pone akshon tras di e palabranan”, Blokhuis ta haña.
‘Hulanda por siña di Boneiru’ – Blokhuis
Den dos dia Blokhuis a bishitá kasi tur instituto pa kuido i di kuido pa pasa dia, na Boneiru. Tambe el a sera konosí ku e Kolegio Ehekutivo. “Tin hopi propio inisiativa for di e poblashon. Hopi biaha esaki ta bini di abou, pa motibu di un nesesidat. Esei ta un tipo di kuido konsiderá bastante lógiko aki. Hulanda por siña di e ehèmpel ei.”
Envionan médiko ta keda nesesario
Segun Blokhuis e kuido di salú ta funshoná bon na Boneiru, kaminda ta brinda 80 porshento di e kuido di hospital. Den algun siman e kuido pa wowo tambe lo bini aserka. ”Pero semper envionan médiko lo sigui ta nesesario. Na Hulanda tampoko tur spesialismo ta disponibel tur kaminda.”
