KRALENDIJK – Refugiado tin derechi riba akohida. Kolegio pa Derecho Humano ta sostené e direktiva di e organisashon di Nashonnan Uní di refugiado UNHCR ku mester duna refugiado venesolano na Aruba, Kòrsou i Boneiru un akohida drechi.
Presidente Adriana van Dooijeweert di e Kolegio pa Derecho Humano durante su bishita na Boneiru a bisa ku e isla mester traha na un akohida pa hende sin kas, pashènt sikiátriko i refugiado.
E problema di hende ilegal di Venezuela na Boneiru ta hopi ménos angustioso ku na e islanan bisiña e ta bisa: “Mi a komprondé ku e grandura di e problema na Aruba ta hopi bia mas grandi ku gobièrnu ta bisa, ku tur dia tin hopi hende di Venezuela ta bini aserka. Aki na Boneiru e problema ta basta chikí, pero kada hende ta unu.”
Shen mil pa detenshon di ilegal
Van Dooijeweert no ta mira konstrukshon di un sentro di buskadó di asilo tuma lugá dje lihé ei, i ademas esaki por sosodé solamente si Hulanda finansiá. Minister Stef Blok di Asuntunan Eksterior,durante su bishita na Kòrsou, mes dia ku Van Dooijeweert tabata na Boneiru, a primintí 100 mil euro pa oumentá e kapasidat di detenshon pa hende ilegal.
Pa e akohida di refugiado el a referí na UNHCR. Segun Blok e mayoria di venesolano ilegal na e islanan no ta buskadó di asilo.
Mester akohida pa hende ilegal
Na Boneiru no tin sentro di detenshon òf otro akohida pa hende ilegal. Por bini un infrakshon di derecho humano si laga hende pa nan kuenta, segun Van Dooijeweert. P’esei e presidente di e Kolegio ta haña un fasilidat di akohida na Boneiru un nesesidat. “Si tin refugiado ku aki no por kuida nan mes, ku mester biba di pidi limosna òf kisas di kriminalidat chikí, bo ta papia di derecho humano.
Ademas no ta solamente e derechonan humano di refugiado ta e kaso, sino tambe di e pueblo ku ta hañ’é ku e situashon aki, por ehèmpel si tin peliger pa salubridat públiko. Den un sentro di akohida segun e Kolegio lo mester ofresé sikiera kama, baño i pan pa refugiado, hende ku problema síkiko i hende sin kas.
