WILLEMSTAD – Djabièrnè lo bai tin un enkuentro kaminda ku tur e 14 partidonan enbolbí lo risibí informashon riba futuro kontinuashon di e instituto pa formashon di fishi, Feffik.
Cristian Reyes a bisa ku komo studiante nan ta preparando pa e diálogo nashonal, ounke e punto mas importante pa nan ta keda mantenshon dje skol di fishi habrí.
Ramón Yung ta papia cu studiante Cristian Reyes
Den kaso ku mester bini ku kambio, mester por duna e studiantenan e garantia ku nan lo keda ku tur e benefisionan ku nan tin na Feffik, segun Reyes.
Mas aleu e hóben studiante ta bisa di a tuma nota di un grabashon ku ta pasando di un skol kaminda supuestamente lo mester bai duna formashon di fishi. Pero esaki mas bien ta ‘manipulashon pa brua hende’, segun Reyes. “Pasó ta un edifisio blo bashí ku un hende so ta kana bai bin, manera por mira riba e grabashon ku ta pasando den medionan di komunikashon. Nos no kier bira proefkonijn di niun hende.”
Pa loke ta e problema prinsipal ku ta e parti di finanshamentu, e studiante ta splika ku diferente otro instituto supsidiá dor di gobièrnu tin problema finansiero. El a indiká ku gobièrnu ta finanshá tur e debenan na Universidat. Pues Feffik ku ta e úniko skol di fishi tambe tin derecho di keda eksistí, pasó a logra baha e debenan dje instituto, pero tòg ta buska manera di sera e skol. P’esei pa Reyes tin algu ku no ta kuadra.
‘Debenan ta na gobièrnu mes’
Edward St. Jacobs, president sentral sindikal SSK
Tantu sindikatonan komo sektor privá ta deseá mas informashon, promé promé ku por bai un diálogo nashonal riba futuro di Feffik. Asina president di sentral sindikal SSK, Edward St. Jacobs a duna di konosé.
Tin indikashon ku ta debí na e situashon finansiero, esta debe, ku mester stòp ku Feffik i tin otro vershonnan ku tambe e sindikatonan a tuma nota di nan. Pero si ta debí na e debenan ku Feffik tin, e sindikatonan no ta mira dikon gobièrnu mester a tuma un desishon tan drástiko.
Pasó Feffik no ta e promé ni último instituto ku tin problema finansiero. Ademas, gran parti dje debenan ku Feffik tin, ta netamente na gobièrnu mes, den forma di debenan atrasá na impuesto, na e fondo di penshun i tambe na SVB. Pues ta trata di debenan pa kual lo por yega na un areglo di pago i asina solushoná e problema.
E sindikatonan sigur no ta di akuerdo ku pa motibu dje situashon finansiero, ta disidí di eliminá e instituto di formashon, lagando e hóbennan studiante ku tin un fishi den nan man, ‘kompletamente desampará’.
