ORANJESTAD – 14 aña kaba e dama kolombiano Sul Martinez ta kana buska riba e landfill yen yen na Parkietenbos. E ta buska heru, koper i otro kos ku e por bende, ounke ta prohibí pa kue kos ei i tin peliger di morto tambe, pasobra e dùmp di material peligroso regularmente ta na kandela.
Serlimar ta e gerente di e landfill. E kompania di gobièrnu ta pone regla kla: bai ku kos i usa e shushi di nobo ta estriktamente prohibí pa tur hende: Bishitante, kontraktante i trahadó. Ta yama asta polis si esaki ta nesesario.
Kon ta posibel antó ku Martinez i e otronan ya pa añanan largu por yega na e seru di shushi, no ta kla. E mes ta bisa ku e gobièrnu anterior a duna un pèrmit. E material ku e haña e ta bende ku kompania manera Daltra i un kompania di resiklahe na e otro banda di e landfill, konosí komo ‘e chines’.
Paña bieu ta bai Venezuela
Martinez ta kolektá paña ku no ta usa mas tambe, ku e ta manda pa e indjannan Wayuu na Colombia. “Nan bida ta difísil.” I tin paña ta bai Venezuela. “Mi gusta yuda e pais bisiña, maske ta ku djis algun paña pa bisti. Nan por usa esaki bon.”
E kolombiano ta yama su mes i e sobrá buskadónan di shushi ‘resiklista’. E ta bisa ku tur hende ta trata di gana algu aserka, pasobra e isla ta bira mas i mas karu. Pero e no ta haña e trabou peligroso. “Pa protehá nos mes nos ta bista manga largu, hanskun i un kapa di tapa boka.”
Shushi radioaktivo
Pero e landfill ta peligroso pasobra den e setenta aña di su eksistensia a tira tur tipo di shushi huntu. Asta tin material radioaktivo. Djis bou di e kapa di mas ariba e shushi ta sombra di kandela ku ta sende spontáneamente. Brantwer mes no ta masha entusiasmá pa paga kandela na e dùmp. Solamente ora tin kandelanan grandi manera djabièrnè pasá, nan ta subi e seru di shushi.
‘No hiba shushi di kas mas pa e dùmp’- minister Oduber
E landfill Parkietenbos ya tin desena di aña ta kousa molèster na e barionan rònt di dje i e ta un desaster ambiental pa e área di mangel protehá. No opstante hopi promesa pa sera e dùmp i san’é, ainda niun gobièrnu no a realisá esaki. For di 2 di yüli di tur manera no ta tira shushi di kas mas, e minister di medio ambiente aktual, Otmar Oduber ta bisa: “I otro aña mester sera e dùmp definitivamente pa san’é.”
Pero pa Martinez esaki ke men fin di su entrada èkstra. “Nos i nos famianan lo bai pasa den mas difikultat.”
