DEN HAAG – Kasi un aña despues di orkan Irma e munisipio karibense di Sint Eustatius ta haña 800 mil euro di Den Haag pa drecha e daño grandi na naturalesa i medio ambiente. Lo bini mas mata bèrdè, miéntras ku kabritu ku ta kana lòs ta sigui kome e paisahe.
E orkannan Irma i Maria aña pasá a kousa daño grandi na naturalesa i medio ambiente di e isla. Hopi palu grandi i históriko a kai ku e konsekuensha ku awor kalor i eroshon ta sigui oumentá na e isla, asina Stenapa, e organisashon lokal pa protekshon di naturalesa, ta teme. Loke ta hasi e situashon mas pió ta ku kabritu i otro bestia ya pa añanan largu ta kana rònt liber i ta kome tur kos riba e isla.
E organisashon ta haña un gran parti di e supsidio pa planta palu nobo. Lo kria palu lokal den kas di glas pa planta nan den e sentro bieu di e siudat chikí i den barionan ku kas di biba. Ku waya rònt di nan, kontra e bestianan, asina Stenapa ta primintí.
E trato di e problema di bestia ku ta kana lós no ta kai bou di e sèn di supsidio. “E proyekto di palu ta solamente un parti di e solushon pa drecha naturalesa, e otro parti ta pa trata ku bestia ku ta kana lòs”, direktor Clarisse Buma di Stenapa ta reakshoná.
E problema ta bira mas grandi
Un detaye interesante ta ku Sint Eustatius último añanan a haña sèn pa trata ku bestia ku ta kana lòs. E kabritunan ku tabata kana kome kos riba e barankanan tabata kousa eroshon ei i ku esaki tambe peliger mortal pa habitante i turista. Poko dia ei un baranka a lòs pasa den muraya di Stenapa. Abou di e barankanan tambe tin restorant, hotèl, i lugá pa parker outo.
E eroshon ta menasá un fòrti históriko tambe, ku ta propiedat di gobièrnu hulandes. “Na e fòrti a pone waya di koriente pa tene e kabritunan afó, pero ainda nan ta kana ei riba e baranka”, Buma ta konta. “Hende ta bisa mi ku e waya no tin koriente.”
Dil ku e kabritunan
Komisario di gobièrno Mike Franco, ku mester pone òrdu na nòmber di gobièrnu hulandes, ta rekonosé ku ‘hopi tempu no a tuma akshon’ i ku ainda e kabritunan ta kana rònt.
Pero nos ta trahando si pa yega na un situashon kaminda un pa un lo marka tur e kabritunan elektrónikamente, ku nan doño lo tene nan paden di tranké, i si esaki no sosodé por tuma medida kontra nan”, segun un bosero na nòmber di Franco.
Ta bai usa 300 mil pa e plantamentu di palu, asina a sali for di e desishon di sekretario di estato Raymond Knops (Relashonnan den Reino). E ke mira resultado promé ku fin di 2019.