Pòrtrèt: Elisa Koek

WILLEMSTAD – 7,4 porshento di e beibinan nasé den 2017, tabatin un mama di diesnuebe aña di edat òf mas yòn. Esei ta kasi un porshento mas ku den 2016. Segun Desi Frans di Famia Planiá ta bayendo bon ku e dunamentu di informashon, pero ainda e fundashon no por drenta tur skol pa duna edukashon seksual.

Edukashon seksual no ta parti standart di e kuríkulo na Kòrsou. Tin dosente ku ta hinka nan mes pakete di lès den otro i tin biaha ta yama Famia Planiá. “Pero, lástimamente ainda nos no por drenta tur skol”, Frans ta splika.

Pèrmit ta un opstákulo
Prinsipalmente na e skolnan di e Direktiva di Skol Katóliko (Rooms-Katholiek Centraal Schoolbestuur, RKCS) tin problema. “E dosente ke risibí nos, pero e mester di pèrmit di e direktiva. E direktiva na su turno ta bisa ku e mester di pèrmit di e mayornan. Ta dura asina largu, i tin biaha no ta logra mes.”

Un otro punto di atenshon ta, ku no tin masha tempu pa profundisá: ta pone multiple klas huntu i e lès ta dura 45 minüt. “E muchanan tin hopi pregunta pero no tin tempu pa kontestá tur.”

Adelanto
A largo plaso e kantidat di embaraso di mama adolesente ta bahando si. Den 2011, 10 porshento di e beibinan ku a nase tabatin un mama adolesente. Segun Frans e mamanan ta un tiki mas bieu tambe, awor. “Mientras nos tabata mira mucha muhé di diestres, dieskuater aña regularmente, e edat ta subiendo awor te banda di diesseis aña. Tin adelanto si.”

Porsentahe di beibi nasé for di un mama ku 19 aña di edat òf mas yòn:

2017: 7.4
2016: 6.5
2015: 8.2
2014: 8.5
2013: 9.3
2012: 9.8
2011: 10