DEN HAAG – Hende na Boneiru, Saba i Sint Eustatius na 2019 nèto lo bai dilanti un poko. Gabinete lo baha e gastunan di dunadó di trabou i suèldo mínimo i kompensashon finansiero sosial lo subi ku sinku porshento.
Esei ta un di e medidanan ku a divulgá riba ‘prinsjesdag’, e dia ku na Hulanda ta habri e aña nobo parlamentario i ku gobièrnu ta divulgá su plannan.
Gastu di dunadó di trabou ta baha
E asina yamá gastunan otro aña lo baha di 18.4 pa 13.4 porshento. Asina trabou lo bira mas barata. Ku e medida aki gabinete ta ferwagt ku e suèldo mínimo lo subi i ku habitantenan lo sinti esaki den nan pòtmòni. Banda di e oumento di sinku porshento, despues lo subi e suma un tiki ku e inflashon anual.
Kompensashon finansiero sosial tambe ta subi ku sinku porshento mas ku a anunsiá anteriormente e aña aki. Ta trata por ehèmpel di ònderstant, AWW i penshun básiko AOV ku ta subi huntu ku suèldo mínimo.
Hopi krítika riba gabinete
Na Boneiru, Saba i Sint Eustatius hopi habitante ta pasa trabou pa sali ku nan sèn. Hopi krítika ta bini di Boneiru, kaminda mitar di e habitantenan ta riba òf bou di e entrada mínimo nesesario pa por biba.
E bahamentu di e gastunan di dunadó di trabou ta un di e ‘medidanan konkreto di gobièrnu pa kombatí pobresa’, segun rei Willem-Alexander den su diskurso dia di apertura di aña parlamentario na nòmber di gabinete Rutte III.
Tambe, meskos ku gabinete a primintí anteriormente e aña aki, tur aña lo bini plaka pa drecha akohida di mucha na e islanan. Lo ta trata di 3 mion euro.
E parlamentario Antje Diertens ta kontentu ku e ‘oumento grandi’ pa e islanan. Den un tweet e ta skibi:
Oumento grandi pa e kontribushonnan pa islanan BES:
• 3 mion euro pa aña pa akohida di mucha.
• Suèldo mínimo ta subi ku 5%, i tur otro pago sosial tambe.
• 50% oumento di kompensashon pa yu.
Oposishon: e medidanan no ta sufisiente
Segun e partidonan di oposishon GroenLinks i SP e medidanan no ta sufisiente pa redusí e pobresa grandi riba término kòrtiku. E kompensashonnan finansiero sosial ta hopi mas abou den e munisipionan karibense, miéntras ku e kosto di bida ta hopi mas haltu ku na Hulanda oropeo.
E partidonan di koalishon si ta kontentu ku e medidanan. CDA tambe, pero e partido ta eksihí si pa gobièrnu rápidamente bini ku un plan di akshon pa e añanan ku ta bini.
30 mion euro pa pobresa, infrastruktura i ekonomia
Un otro kos pa gabinete saka kara kuné riba apertura ofishal di aña parlamentario ta ku nan tin 30 mion pa kombatí pobresa, mehorashon di kayanan i pa stimulá ekonomia di e tres munisipionan karibense. Notisia ku a divulgá kaba for di febrüari di 2018.
E sèn ei lo no yega e islanan mésora. Sekretario di estado Raymond Knops (Relashonnan den Reino) a avisá kaba ku e tres islanan ta haña e plaka numa te dia gobièrnu lokal koperá. “Ta hasi e invershonnan aki na momento ku ta trata di bon gobernashon i un maneho finansiero sano.”
