WILLEMSTAD – E proyekto di renobashon di Kura’i Shon Fil na Otrabanda ta pará ketu, asina minister Zita Jesus Leito di Tráfiko, Transporte i Planifikashon Urbano a deklará. Esaki ta motibu ku tin konstrukshon ilegal riba e tereno destiná pa e kancha di deporte.
Komishon Kura’i Shon Fil a aserká e habitante ku a traha vários konstrukshon ilegal riba tereno di gobièrnu, despues ku e ministerio a bis’é ku lo basha su konstrukshon abou. Según Lisandra Martis, presidente di Federashon Otrabanda, loke el a konstruí no ta benefisiá e bario ni e hóbennan, pero ta un konstrukshon pa benefisio propio.
Un reportahe di Deya Mensche
“No por rekompensá un persona ku a kue un tereno ilegalmente i ta strobando e konstrukshon”, minister Jesus Leito a splika. Finalmente minister Jesus Leito a deklará ku lo enkargá e kontratista di e proyekto ku e desmantelashon di e konstrukshon.
Proyekto Kura’i Shon Fil
Union Europeo a finansiá e proyekto i a dura aproksimadamente 25 aña pa realis’é. A kuminsá ku e renobashon di Kura’i Shon Fil na febrüari último i ta premirá ku lo finalisá e proyekto na 2019. E proyekto di renobashon no lo mishi ku e edifisionan, paso e ophetivo ta pa drecha e infrastruktura di e kayanan riba tera i bou di tera, entre otro e sistema di kloaka, kabel i pipanan di Aqualectra i kabel di telefòn. Trabou riba tera lo enserá ponementu di klenku òf asfalt, pal‘i lus, bòrchi i nòmber di kaya ets. Según Dennis Klaus, arkitekto i Otrabandista orguyoso, gobièrnu a neglishá mas ku 50 aña di mantenshon.
Mike Brissett & Lisandra Martis di Komishon Kura’i Shon Fil i Federashon Otrabanda. Potrèt: Deya Mensche
Según minister Jesus Leito e proyekto ta un oportunidat grandi pa Otrabanda i Kòrsou i e ta konsiente ku ta mantenshon ku mester a tuma lugá kontinuamente. “No ta e intenshon pa laga kos bai fo’i man mas asina i tin un plan pa manehá esaki den futuro”, e minister a splika. Mester bin un plan di maneho fiho ku ta envolvé e habitantenan komo gerente, Mike Brissett, presidente di Komishon Kura’i Shon Fil ta añadí.
Banda di Kura’i Shon Fil, e proyekto lo akapará e barionan di Nieuw Nederland, Zapateer i Tera Kòrá. Según Klaus, e renobashonnan di Nieuw Nederland lo kosta 7.2 mion florin – 3.6 mion euro – i e parti di Kurá Shon Fil ta 5.5 mion florin. Komishon Kurá Shon Fil, ku ta konsistí kompletamente di boluntario, ta hunga e ròl di vigilante sosial pa e proyekto kana bon i bini kla.
| Ken tabata Shon Fil? Shon Fil a nase na 1859 komo Wenceslao Simon Philip de Jongh i tabata biba den Landhuis Mayflower situá na Naniesteeg huntu ku su kasá i shete yu. Shon Fil tabata doño di Bon Fortuna ku despues a bira Landsloterij i tabata un dje promé komersiante ku tabata importa outo na Kòrsou. Ela laga hopi kas i tereno pa su herederonan i despues ku nan tambe a muri, e kasnan a bin para bashí. Fuentu: Fundashon Pro Monumento – Jeannette van Ditzhuijzen, Gerda Gehlen i Els Langefeld. |