KRALENDIJK – René Clemencia ta haña fiesta di San Nicolas ‘rasista’, ‘skandaloso ’i ‘ofensivo’. E tata di 33 aña di edat no ta selebrá e fiesta di mucha ku su dos yunan i su kasá. Pa motibu di Hulanda su kolonisashon di Antia e ta hañ’é ta dil ku e fiesta, e ta bisa.
“Ta portretá Zwarte Piet manera un hende bobo, ku solamente por sigui enkargo i orden ku dun’é i ku no por pensa pa su mes”, Clemencia ta bisa. Esaki ta bini for di e buki di Jan Schenkman, “Sint Nikolaas en zijn knecht” (San Nikolas i su sirbidó), di aña 1850. E ta haña ku ta malu ku te dia di awe ta konektá Zwarte Piet ku hende koló skur.
Un reportahe di Ronald A. Muyden
Segun Clemencia esaki no ta doloroso pa e mes, pero e konosé sufisiente amigu i famia ku si tabatin konfrontashon ku esaki. “A tenta amigu ku Zwarte Piet i a pidi nan hasi ‘kenshi’.
René Clemencia ku su kamisa di ‘zwarte piet ta rasista’. Potrèt: René Clemencia
Diskushon di Zwarte Piet i polítika lokal
San Nikolas ta yega tera na e waf yamá pa e kapitan boneriano: Waf Juan Francisco “Chicu”Mercelina. Ora puntr’é, San Nikolas ta remarká ku ta na polítika di Den Haag pa sigui debatí e diskushon di Zwarte Piet. “Tanten ku e muchanan aseptá yegada di San Nilolas na Boneiru, e lo bini Boneiru”, San Nicolas bistí ku meiter ku un krus ariba ta bisa.
Segun e diputado di kultura Edsel Cecilia e no a haña hopi señal ku tin un diskushon di Zwarte Piet na e isla. “Ami mes ora mi tene spich mi ta yama nan Pietjes.” E mandatario lokal ainda no a pensa un maneho pa esaki, e no ta bagatelisá e posibel sintimentunan i e ta haña importante pa komo gobièrnu pensa kiko mester hasi na esaki.: “Na Hulanda nan tin piet di arko iris. Nos ta bai wak kiko nos por hasi den futuro.”
Solamente pretu
No tabatin Piet shushá na rut, sino nan tabata mas pretu ku pretu
Tur e Pietnan tabata pintá solamente pretu, sin òf ku poko lipstik na lep, ku òf sin peluka di afro. Algun aña pasá si tabatin e diskushon di Zwarte Piet na e isla. E ayudantenan a haña un kara kolorido, ku awe no a sobra nada di dje.
Normalmente ta gezaghèber boneriano òf su suplente ta presente ora di risibí San Nikolaas. E bia aki niun di dos no tabat’ei. Gezaghèber suplente Curvin George ta laga sa ku den un deliberashon na Kolegio Ehekutivo a palabrá esaki. Ta e diputado di kultura so lo a representá gobièrnu e aña aki. Gezaghèber Edison Rijna te 24 di novèmber tabata na Hulanda di bishita di trabou.
Mama Lucy ku su yu muhé na e parada di San Nikolas i Piet na Boneiru. Potrèt: Ronald A. Muyden
Un mucha muhé bisti na un T-shirt blanku di San Nikolaas ta para banda di su mama ta kuminda e marcha ku ta pasa di San Nikolas i Zwarte Piet sinta den un trein di turista i diferente garoshi di gòlf. El a gosa di e parada ku e Pietnan ku tabata toka tambú i hasi kenshi akrobátiko. Mama Lucy ta bisa ku e sapatu di papel ku nan a traha na skol awe lo sali di bon.
Regalo lo bin ku Papa Pasku
Na kas di famia Clemencia lo tin regalo tambe. Pero eseinan si ta bini ku Papa Pasku.