KRALENDIJK – Durante un bishita na Boneiru masha masha kòrtiku e promé minister hulandes Mark Rutte ta enfatisá ku e mihó manera pa yuda un hende pober ta ku un trabou, no ku un ònderstant mas haltu. P’esei kombatimentu di pobresa na BES no ta solamente un asuntu hulandes, sino un responsabilidat huntu.
Esaki Rutte ta bisa ora puntr’é pakiko gobièrnu hulandes no ta logra trata e desigualdat, espesialmente pobresa, na Boneiru, Sint Eustatius i Saba. Ademas Hulanda ta tarda pa establesé un mínimo sosial pa e islanan. Miéntras ku for di investigashonnan ta sali ku e desigualdat ta birando mas i mas grandi..
“Na final e mehorashon mas grandi ku un hende por tin ora e ta pober, ta un trabou. I dunamentu di trabou no ta algu ku nos por regla for di Den Haag. Ta Kolegio Ehekutivo ta regla esaki ku ekonomia”, Rutte ta kontestá.
Aña pasá novèmber Reino i gobièrnu lokal di Boneiru a palabrá pa hasi mediashon di labor tambe. Huntu nan ke kuminsá un sentro di trabou kaminda servisio pa buskadó di trabou i dunadó di trabou ta bini huntu den un bentana. Segun e Akuerdo di gobernashon pa mas lat e luna aki lo tin un plan konkreto i e aprobashon huntu di esaki.
Desempleo
Na Boneiru 6.7 porshento di e poblashon ku ta traha no tabatin trabou na 2016. Segun Ofisina Sentral pa Estadístika esaki ta nifiká 770 hende sin trabou.
