WILLEMSTAD – Na Kòrsou apénas ta tene kuenta ku hende ku un limitashon (físiko). E isla no tin fasilidat spesial pa ròlstul, apénas di lugá di trabou adaptá i den e área di deporte tampoko no tin masha posibilidat.
Aksel Cijntje for di su aksidente ta dependé di un ròlstul. For di e tempu ei e ta empeñá pa otro hende ku un limitashon físiko via su fundashon ‘You Are a Hero’. Wak e relato di Aksel aki ‘bou.
Outor Kim Hendriksen (Na Hulandes)
Juni Harms tambe tin añanan largu ta empeñá pa yuda hende ku un limitashon físiko hasi deporte. Pero e si ta pinta un otro historia. “Ta bèrdat si ku aktualmente no ta ofresé deporte manera basketbal pa ròlstul òf tènis pa ròlstul. Den pasado nos a ofresé e deportenan aki si na e grupo, meskos ku kayak, kore kabai, tira, sambuyá i asta bowling. Pero ta mi eksperensia ku tin tiki petishon i interes for di e grupo mes.”
Petishon i oferta
“Nos ta mira ku hopi persona ku despues di un aksidente a resultá den ròlstul ta bai Hulanda pasobra aki tin tiki òf niun posibilidat pa futuro.”, Harms ta splika. “Pa esnan ku keda, deporte hopi bia ta un luho tanten ku no a kumpli ku otro prioridat manera transpòrt, kas, trabou i nesesidat básiko adaptá.”
Hopi bia tampoko nan no tin un pasado di deporte kompetitivo i/óf e medionan finansiero pa kontribuí na e deporte. Tanten ku no tin pedida, e oferta tambe lo bira ménos, i esei ta lástima pa esnan ku sí ke”, segun Harms.
6 mion pa deporte
Segun Lizette Sambo Velder, direktor di sektor Kultura i Deporte, gobièrnu e aña aki ta pone ‘un total di 6 mion florin antiano (sigur 2.7 mion euro) disponibel na deporte’.
Un parti chikí di e bùdjèt aki ta pa hende ku un limitashon físiko òf mental i ta partié den dos fundashon: Fundashon Desaroyo Deportivo Kòrsou (DDK) i Curaçao Little League Foundation.
| Fundashon Desaroyo Deportivo Kòrsou (FDDK) ta okupá su mes pa perkurá pa tin 1 te 2 ora pa siman di deporte pa hende ku un limitashon mental òf físiko. “Ta e intenshon pa bou di guiansa nan hasi tur sorto di disiplina deportivo, pensa aki riba diferente deporte di bala”, Jennifer Martina di ministerio di Enseñansa Kultura, Siensia i Deporte ta konta.
Curaçao Little League Foundation ta okupá su mes ku baseball i softball hubenil. E fundashon tur aña ta tene un torneo di algun siman spesífikamente pa hubentut ku un limitashon. |