WILLEMSTAD: Internista N.B. otro siman ta bini dilanti komishon disiplinario despues di keho di violashon seksual di pashènt. No ta promé bia: Na Hulanda un bia kaba a kondená e médiko pa kondukta seksualmente no deseá. B. ta nenga i e ta bisa ku e ta ‘kontentu’ ku e kaso ta bini dilanti komishon disiplinario pasobra e ora ei ‘bèrdat lo sali’.
Fula pechu i vagina, brasa i sunchi, i asta penetrashon pa medio di hinka un dede den anus i vagina. Tur ta akto ku B. lo a kometé, i tin duda grandi si esaki tabata médikamente nesesario. Ademas algun pashènt a bisa ku durante di esaki e tabatin un erekshon.
Mayoria di e kehonan ta bini di pashènt ku B. a trata ora e tabata traha na Hòspital Sint Elisabeth na Kòrsou. Na aña 2013 su koleganan internista tambe a entregá un keho na Inspekshon di Salubridat Públiko tokante su kondukta serka algun pashènt femenino. Poko tempu despues e hòspital a kanselá su kòntrakt.
Pero e internista a keda traha na Kòrsou i e ta trata un 900 pashènt pa siman. No ta kla pakiko servisio di inspekshon e tempu ei no a reakshoná riba e kehonan i pone nan serka komishon disiplinario.
Suspenshon na Hulanda
Na Hulanda a suspendé e internista pa seis luna pa violashon di kuater pashènt femenino.
For di e sentensia di Kolegio Disiplinario Sentral di Salubridat Públiko na Hulanda (2004) ta sali ku e kehonan di e víktimanan hulandes ta korespondé ku esnan na Kòrsou: hinka dede den vagina sin motibu médiko, sunchi riba boka i primi su pashèntnan kontra di su kurpa miéntras ku e tabata haña un erekshon.
Esaki a sosodé den e temporada 1999-2000. E hòspital hulandes kaminda e tabata traha e tempu ei a kit’é for di trabou entrante inmediatamente. Pero segun e komishon disiplinario no tabata nesesario pa dun’é un kastigu mas pisá pa motibu di e chèns di ripitishon.
‘Ta fásil pa hasi keho, pero ta trata di bèrdat’ – internista N.B.
Awor B. ta bisa tambe den un reakshon ku e kehonan na Hulanda no tabata bèrdat i ku ta inhustu. “Ta fásil pa hasi keho, pero ta trata di bèrdat.” Ke men e kehonan na Kòrsou tambe e ta ninga i e ta bisa ku durante e kaso disiplinario den korte lo e bini ku prueba.
E kaso a keda sin trata na servisio di inspekshon
E keho ku ta para sentral den e kaso disiplinario, ta di un hende muhé na 2007. E tempu ei el a trata sin resultado pa haña oido serka hòspital. Aña pasá porfin el a entregá keho serka servisio di inspekshon. Ounke a aseptá e keho enérgikamente i a sali na kla ku tin mas keho kontra e internista, despues ku a suspendé inspektor general Jan Huurman e kaso a keda sin trata atrobe. Entretantu e persona mes a entregá un keho serka komishon disipinario.
E internista ta traha na Antillean Adventist Hospital (Hospital Advent). Aña pasa mes servisio di inspekshon a duna e hòspital un but pisá pa motibu di su aktuashon. Na 2017 a desakreditá e internista pa motibu di morto di un pashènt. For di e tempu ei e internista por mira pashènt solamente bou di supervishon di un kolega-internista. Pero segun servisio di inspekshon e no tabata tene su mes na esaki.