KRALENDIJK – Riba e pregunta si ‘El Libertador’ Simon Bolivar e dianan aki no ta bòltu den su tumba, Claudia Noriega ta kontestá: “kómpolaga!” E boluntario di e asosiashon di interes VENEX Boneiru sa masha bon ken e luchadó famoso pa independensia suramerikano ta.
Na Boneiru tambe ta kolektá artíkulo di ousilio i remedi pa Venezuela. Tur kos ku kolektá mester bai e hub na Kòrsou. E presidente interino di Venezuela Juan Guaidó djasabra a spera di risibí e promé artíkulonan di ayudo, pero presidente Nicolas Maduro a sera frontera pa evitá esaki.
Remedi karu
Un gran parti di Noriega su famia ta biba na Caracas, entre nan su mama i tantanan. P’e ta doloroso pa tende ku un famia tin keintura òf un infekshon i no por haña algu pa pasa doló òf antibiótika.
Ronald A. Muyden den kombersashon ku Claudia Noriega
“Mi suegu un dia tabatin mester di remedi pa baha preshon. No por a haña esaki niun kaminda. Nos a manda poko for di Boneiru. Miéntras ku riba su edat haltu e mester tuma un remedi asina tur dia. Binti aña pasá tabata normal ku bo por a haña algu asina na botika na Venezuela. El a bira algu eksklusivo.”
Claudia Noriega ta duna un indikashon pa preis di remedi na Venezuela. Potrèt: Ronald A. Muyden
E venesolano ta mustra un papel basá riba e balor ofishal di dòler di gobièrnu venesolano DICOM di 14 di febrüari último. “E ta masha karu na Venezuela. Miéntras e suèldo mínimo ta 5.45 dòler.” Segun e lista un kaha di kos pa pasa doló so ta kosta 16,90 dòler kaba. Antibiótika ta 28.80 dòler.
E estatua di Simon Bolivar na Playa ta mustra bandoná. E venesolano Bolívar den siglo 18 tabata ‘El Libertador’ di Venezuela, Colombia, Ecuador, Panama, Peru i fundadó di Bolivia. Algun meter mas leu na Wilhelminaplein tin un grupo chikí di hende pará. Muzik venesolano ta zona.
Tras di un di e dos mesanan na Wilhelminaplein tin diferente boluntario pa bende T-shirt. Ku e ganashi ta kumpra artíkulo di ousilio. Na e otro, tapá ku un bandera venesolano, tin produkto manera kuminda di baby, ariña di funchi, ariña di pan i suku. Hende ta bini i bai. Un hòmber ta trese dos saku di plèstik blanku yen di produkto. “Pa yuda e hendenan na Venezuela.” E ta kuminsá yora. Un boluntario ta tuma entre otro e papel di wc, zeta dushi i e blekinan. “Su famia ta biba na Venezuela i p’esei e ta emoshoná”, e ta bisa poko poko.
E intenshon di Guaidó tabata pa risibí e promé artíkulonan di ousilio riba 23 di febrüari, dia di libertat. Esei no a logra. Te dia di awe no a logra pa hiba artíkulo di ousilio Venezuela.