WILLEMSTAD – Djadumingu ultimo a klousura e temporada festivo di Seú, un fiesta di kosecha unda gradisimentu i prosperidat ta para sentral. Pa más ku 200 aña, pueblo di Kòrsou a salí den kayanan di Banda’bou, i e delaster 45 aña tambe den esnan di Otrobanda, durante e marchanan kultural ku día pa día ta birando más grandi.
Un reportahe di Deya Mensche
Según Christopher de Wind, dirigente di grupo Sembrado di Speransa, gobièrnu mester duna mas sostén finansiero na e selebrashon di Seú, paso esaki ta kresiendo eksponensialmente. Apesar di estado prekario di nos ekonomía, tog 42 grupo a partisipá e aña aki.
Portrèt: Deya Mensche
Remarkabel ta ku e selebrashon di Seú ta hopi mas grandi ku karnaval, apesar ku Seú ta haña menos sostén komersial. Según Lionel Jansen, presidente di Fundashon Kultural Kòrsou, gobièrnu ta hasi sufisiente mirando e situashon ekonomiko aktual. Jansen ta lamenta ku gruponan tin mal kustumber di sténs riba gobièrnu of e fundashon pa finansiá nan. Si Jansen ta haña ku e sén mester yega na tempu, pa asina Seú su potensial komo produkto turístiko por bira más grandi i gobièrnu por promové e marcha komo patrimonio kultural. “Hopi turista ta interesa den e historia di nos país i ke eksperensiá loke ta típiko i úniko, i e selebrashon di Seú ta esei sigur pa Kòrsou”, ela splika.
Ret Karibense a wapa ku Deborah Lantveld, un surnameo ku tin dos aña biba na Kòrsou, i ken a partisipá pa promé biaha ku grupo Sembrado di Speransa. “Ta importante pa e turista of e ekstranhero bibá na Kòrsou, eksperensiá e kultura kurasoleño. No laga hende konta bo, pero tuma un kurashi i djòin un grupo”, ela splika.
Portrèt: Deya Mensche
Hóben ta para sentral
E aña aki e Kantadó mayo ta Sharrel ‘Adjatay’ Denisia, di 24 aña, ku ta hasi’e e ganado di más hóben di e kompetensia. Adjatay, kende ta bini di un famia musikal, a kuminsá partisipá ku 18 aña di edat i klasifika varios biaha promé ku ela gana. Según Jansen, e delaster 15 pa 18 aña un ola di sanger fresku a kuminsá flui den e selebrashon di Seú, atraiendo hopi hóben. Jansen ta enfatisa ku e hobennan mester sa ku Seú no ta solamente baile, músika i koreografía i mester kompronde kiko ta e esensia di Seú.
P’esei huntu ku FAJ, Fundashon Kultural Kòrsou a kuminsá drenta skolnan bek pa duna charla i kursonan informativo i ta spera di kontinúa esaki henter aña. Tambe nan a introdusi un sonido rítmiko na Seú, usando instrumentonan moderno na e base akústiko, algu ku no ta sinta bon serka tur tradishonalistanan. ‘ta hopi importante pa tin hóben den Seú, kual ta baiendo den un direkshon más amplio ku no ta benefisia un grupito so, pero ta pa henter Kòrsou’, Jansen a kontinúa.
De Wind di su partí, sigur ta kere den e hóben i a opta pa traha ku un tím hóben di amigu i famia. ‘Mi ta kere den empodera hóben, i si bo ke hóben den Seú, bo mester imbolukra nan’, ela enfatisa. E aña aki Seú a keda dedika na baluartenan Pincho Anita, Ludwig Isabella miho konosi komo DJ Danger, Ilse Monte i Bertulio Fecunda. A selektá nan pa nan trayektorio i kon nan ta aporta i promové Seú.
