ORANJESTAD – Gobièrnu venesolano a habri frontera ku Aruba atrobe. E frontera ku Kòrsou i Boneiru ta keda será pasobra e islanan aki ta tuma parti pa Merka, segun Venezuela.
A anunsiá e notisia live na televishon via visepresidente Tarek El Assami ku tambe ta minister di industria i produkshon nashonal. Un motibu importante pa habri e frontera di Aruba tin di hasi ku e produkshon di zeta.
Venezuela mester di kapasidat di refinashon i Aruba ke start su refineria atrobe. For di 2016 e eksplotadó di e refineria ta Citgo Aruba, di kua e empresa mama PDVSA ta den man di gobièrnu venesolano.
E frontera ku e otro islanan hulandes karibense ta keda será ainda, pasobra nan ta yuda Estádos Unídos parti artíkulo di ousilio. I asina sostené e oponente mas importante di gobièrnu venesolano, Juan Guaidó.
‘Apertura di frontera ta inoportuno’ -gobièrnu di Aruba
Gobièrnu arubano ta bisa ku nan no a haña notisia ofisial ainda di Venezuela. “Komo gobièrnu serio nos no por aktua a base di un deklarashon na televishon.” Awor gobièrnu ta warda un konfirmashon promé ’pa evaluá kiko nan lo hasi e ora ei’. Pero nan ta bisa kaba: “Un apertura di e frontera entre Aruba i Venezuela aktualmente no ta oportuno.”
E frontera entre e islanan ABC aña pasá febrüari a sera pa di dos bia.
