Durante e reunion den cuadro di IPKO entre parlamentarionan di Aruba, Curaçao y Hulanda a sosode algo remarcabel. A capta imagen di parlamentario Rubiano Sue-Ann Ras (MEP) kende tabata wak Netflix den sala di Eerste Kamer.
Scondi? Si asina Ras ta admiti ora di puntra su comentario despues. “Mi tabata den Eerste Kamer pa prome biaha y no a ripara cu hende sinta patras di mi por wak.” Segun Ras e tabata cansa despues di un dia largo yen reunion, y falta di soño.
“B’a mira ki momento mi a bay wak Netflix? Esey tabata den e ultimo mita ora.” Ras ta saca su Ipad y mustra su anotacionnan, entre otro di e consehonan di e tres profesor invita. “E presentacionnan, relacionan estatal. Mira aki, te e ultimo punto di observacion electoral.”
Ras ta menciona cu el a bay wak pasobra su colega Rubiano Ricardo Croes (RED) a tene un discurso cu ya tur miembronan di delegado tabata conoci. “Fuera di esey e tabata toca di e geschillenregeling, un punto cu nos no tabatin riba agenda.”
“Mi a opta pa bay wak Designated Survior”, Ras ta conta. “E ta djis un pelicula di un presidente di Merca, con e ta anda cu e parlamento y incidentenan. Pero mi tabata tende tur cos den reunion.”
Riba e grabacion por mira cu Ras tambe tabata riba Netflix ora profesor Hirsch Ballin a tene su discurso; ora André Bosman (VVD) a trece un punto riba Venezuela dilanti y ora e president di IPKO Jan André Bosman (VVD) a clausura e reunion.
No ta acceptabel
E pregunta ta si ta acceptabel pa wak un pelicula durante un reunion parlamentario. Cerca e delegacion di Corsou, nan a ricibi e asunto como uno doloroso. “Pasobra esaki ta duna un impresion robes”, William Millerson (PAR) ta comenta. “Mi no ta haya esaki acceptabel.”
“Como president mi tambe tin problema cu parlamentarionan lesando e corant durante un debate. Of ora parlamentarionan ta bandona e sala prome cu minister a reacciona.”
“Netflixen? Esey si nunca mi a experiencia”, Giselle MacWilliam (MAN), parlamentario di Corsou, ta reacciona. “E ta touch ami tambe como representante di pueblo cu esaki a sosode den mi presencia.”
‘Dificil pa hustifica’
“E no ta bon ni husto, pero mi ta haya esaki dificil pa condena”, asina miembro di Tweede Kamer, Antje Antje Diertens (D66) ta bisa. “Esaki ta un momento capta den un total di cuater dia. E ta causa un impresion poco negativo tambe y esey mi no ta sinti ta dushi.”
Segun e parlamentario di partido Hulandes SP, esta Ronald Van Raak, esaki ta confirma e impresion eyfo cu IPKO pa hopi parlamentarionan ta un ‘obligacion’. “Bo ta ripara cu di e delegacionnan hopi hende tabata ausente durante e reunionnan. Esaki ta costa placa di pagadonan di belasting.”
‘Esaki ta un incidente?’
Ras mes ta di acuerdo cu su comportacion no ta ‘netchi’. Na mesun momento e ta haya ‘fastioso’ cu esaki ta sali afo. “Esaki ta solamente un parti chikito di mi participacion”, e ta bisa. “Otro hende tambe tabata riba nan telefon. Anto kico nan tabata haci eyriba?”
Lider di MEP Roco Tjon, e fraccion di unda Ras ta miembro, no kier comenta riba e incidente, solament cu: “Esaki ta un incidente? Ami tabata bou impresion cu algo grave a pasa den Eerste Kamer.”
