Portrèt: Pixabay

WILLEMSTAD – Dia 22 di yüni 2019 Benjamine Novile Josiah Baker ta fayesé den un aksidente di mótersaikel. E ta pèrdè kòntròl riba stür i ta dal ku su kabes den fangrel. Benjamin ta fayesé mésora. Algun minüt despues e promé periodistanan ta yega i ta strim tur kos live via Facebook. Henter Kòrsou por wak e tiner ku a muri den desgrasia.

Medionan di komunikashon asta ta bai asina leu ku dia riba 18 di yüli na Bullenbaai Luwendrick Martha di 14 aña di edat ta fayesé den un aksidente di tráfiko, nan ta filma su mama ful den kámara ora e kaba di yega na e sitio di e aksidente i ta kolèps di fèrdrit.

Video na Hulandes

Outor Kim Hendriksen

Yegada di medionan di komunikashon sosial, ta fasilitá ku por kompartí tur kos mésora via internet. Djis primi un kònòpi i tur hende por mira. Den e kaso di Benjamin tabata un bista riba su sesu ku tabata riba e asfalt. Un imágen ku serka hopi hende a keda grabá den nan mente.

Liz van de Laar a skibi un post riba Facebook kaminda el a eksihí pa Extra kita e imágennan. “Nan a reakshoná mésora i a kita e imágennan, pero e ora ei tabata lat kaba, ya e daño a tuma lugá kaba”, Van de Laar ta bisa.

Portrèt: Facebook.

‘No ta nos intenshon’
Segun Valesca Diaz, redaktor hefe di Extra, e imágennan en bèrdat a bai muchu leu: “No ta nos reportero a saka e imágennan di e sesu di Benjamin. El a bai live si for di e sitio kaminda esaki a sosodé. Mi a papia kuné tokante di esaki ku nos di Extra di niun manera no ke pa e parientenan di e defuntu via nos kanal di media tende ku nan ser kerí a fayesé. E motibu pakiko nos ta presente na e tiponan di aksidente asina ta pasobra nos ke informá komunidat ku algu a sosodé, i kisas ku nan por skohe un otro ruta, no pasobra nos ke kompartí imágen hororoso. Esei no ta nos intenshon”, segun Diaz.

Segun e redaktor hefe lo mester a duna mas training pa pone tur periodista pensa den e mésun direkshon. Èks polítiko Omayra Leeflang dieskuater aña pasá komo minister di Tráfiko tambe a trata ku esaki. Na promé instansha el a konsipiá un kódigo di kondukta pa media.

E tempu ei espesialmente pa fotógrafonan di prensa, ku tabata saka potrèt yen di sanger pa e promé página di e korantnan. Tur hende no ker a firma e kódigo di kondukta: “Den e kódigo di kondukta aki tabatin un fasilidat di mèldu. Esei ke men ku tur hende, siudadano tambe, por a mèldu si a violá e kódigo di kondukta”, segun Leeflang. Tur hende no ker a firma e kódigo di kondukta i p’esei e lei no a pasa nunka.

Ta trahando un lei
Segun e aktual minister di Enseñansa, Siensia, Kultura i Deporte Marilyn Alcalá-Walle tin un lei ta bini pa establesé un tipo di kódigo pa media. E minister ku ta trata esaki ta e Minister di Transpòrt, Tráfiko i Planifikashon Espasial Zita Jesus-Leito. No ta konosí si aki den tin regla di kondukta ku media mester tene nan na dje.