WILLEMSTAD – Aña eskolar nobo a kuminsá i ainda tin bastante famia na Kòrsou ku no por paga pa material di skol. Mayornan ta ricibi yudansa di gobièrnu i iniciativanan priva. Pero kada aña tin mas necesidat. “Mi ñetu no ta bai skol ainda pasobra e no tin pen, pòtlot, map ni kèds”, segun Carla ku tin e kuido di su dos ñetu.
Carla no tin trabou i tampoko e sèn pa kumpra tur material di skol. El a haya un poko ayudo pero e no ta suficiente. Su ñetu di 16 aña ta nenga di bai skol komo ku e no tin tur material ainda.
Tur aña e komienso di aña eskolar nobo tin mayornan ku problema finansiero. Pero e situashon ta birando hasta ‘alarmante’, segun Antonieta Dap-Pieters di Fundashon Dune un Chèns
“E nesesidat pa e yudansa a bira mas tantu. Tin hopi hende ta perde trabou. Tin hopi hende den situashon hopi deplorabel”. Kosto di bida tambe ta mas haltu i ta hasi ku ta mas difisil pa famianan.
Pero Dap-Pieters tambe ta mira ku tin mas yudansa e ultimo añanan. Asina ku hende tambe por abusa esaki. “Lo ta bon pa strukturá e yudansa i kontrola pa evita ku ta hasi mal uso di e yudansa.”
Sentro pa Inovashon Guia Edukashonal, SIGE, tambe ta reparti material pa skol. Nan tambe ta konstatá ku tin un nesesidat ta grandi, Ruthmila Obispo ta bisa. “Nos a kuminsá ku 100 pa 150 mucha. Awor nos ta papia di 400 pa 500 mucha.”
Ounke ku aki i aya den komunidat ta kuestioná prioiridatnan finansiero di mayornan, e ta insisti ku mester evitá ku ta perhudiká e muchanan.
“Nos mes ta filter e muchanan of ta manda nan via e skolnan. Pero sigur lo tin kasonan unda mayornan tin nan prioridatnan robes, i mester duna nan guia. No por perhudiká e muchanan.”