WILLEMSTAD – E temporada nobo di stazje a kuminsá na Kòrsou. Miéntras ku stazjèr hulandes ta mira un stazje desafiante na otro banda di laman, esaki tin un banda skur tambe ku e notisianan ku stazjèr tin molèster di atrako – tin bia violente.

E stazjèrnan ta bisa ku ta te ora nan yega e isla numa ta alertá nan riba e posibel riesgonan. “Aki nan ta menta e kosnan negativo, i kasi nunka e eksperensianan positivo”, segun Sandra, Sara i Anna ku ta kore nan stazje na Kòrsou.

Segun medionan di komunikashon lokal poko tempu ei dos kriminal a ataka i sekuestrá un stazjèr. Polis i Ministerio Públiko ta bisa ku e investigashon ta kore i ku ‘nan no por duna komentario tokante delitu kontra moral’. Den e kasnan di studiante ta bisa ku e stazjèr tabata traha den un negoshi di hóreka i el a bai kana su so riba Caracasbaaiweg i a ofresé un kabes di boto.

Daniel Staal, gerente di diferente edifisio pa studiante, ta avisá e stazjèrnan mésora ku nan yega pa entre otro no tuma left asina ‘sina. “Nos ta asta pone esaki den un kòntrakt. Tres dia promé ku esaki e stazjèrnan ta haña nos reglanan di seguridat den un email.”

Durante e temporada haltu Staal por tin un promedio di 350 hóben den su edifisionan. E stazjèr den e kaso aki no tabata biba den un di su edifisionan i tampoko no a bini Kòrsou via e e ofisina di stazje di mas grandi Wereldstage.

Atrakado ku maskarada i pistol ta atraká studiante di Arnhem na Kòrsou
Titular den De Gelderlander

Titular den De Gelderlander

Notisia na Hulanda tokante atrako riba stazjèr

De Telegraaf a skibi na 2013 ku ‘ta hòrta desena di stazjèr na Kòrsou nan sèn, pas di banko, laptop, kamara, i hoya’. Na 2018 den De Gelderlander a skibi ekstensamente kon hòmber ku maskarada ku arma a horta tas di Lisanne di Arnhem i su amiga. Tiemen Zwienenberg di Haaksbergen tambe tabata víktima na 2018, a pone un pistol riba su kabes i despues e hóben De Gelderland mester a kana bai kas pia ‘bou.

Stazjèr den un kas di studiante na Kòrsou. Potrèt: Deya Mensche

Insidente
Pa aña Staal ta eksperensiá un promedio di un òf dos insidente i Wereldstage ta registrá un promedio di dies insidente serio i binti mas chikí. “Ta mira e stazjèr for di e lugá di hóreka i hopi bia si e no paga tinu e stazjèr no ta ripará ku nan ta siguié”, Staal ta bisa.

Segun Maarten de Jong, e direktor di Wereldstage ku for di 2000 ta guia stazjèr, gobièrnu di Kòrsou i komunidat mester realisá ku e stazjèr hulandes bal oro. “Nan ta trese konosementu nobo for di estranhero i ta pone nan traha entre otro den e ramonan finansiero, médiko i di hospitalidat”, De Jong ta haña. “Gobièrnu mester invertí mas den un manera strukturá di seguridat i informashon pa e stazjèrnan aki. Pasobra tin studiante ku ta bini Kòrsou pa nan kuenta, Wereldstage no tin bista riba nan.”

No tin kapasidat na polis
Imro Zwerver, bosero di polis ta reakshoná ku polis no tin e kapasidat pa mas seguridat i informashon pa stazjèr. “’Politur’ ku ta usa pa protehá turista, por usa tambe pa stazjèr. Lastimamente nos no tin basta personal i nos ta trata di keda na altura di tur atrako”, Zwerver ta bisa.