DEN HAAG – Habitantenan di Boneiru, Sint Eustatius i Saba na 2020 ta haña mas sèn pa gasta, mihó infrastruktura i un gobièrnu mas fuerte. Pa e islanan ABC lo bini ‘ayudo práktiko’ pa motibu di e krísis den pais bisiña Venezuela.
Esaki ta e plannan di gobièrnu hulandes ku Rei Willem Alexander a divulgá den su diskurso na okashon di dia di apertura di aña parlamentario.
Hopi pobresa
Kaminda bibiendanan na Hulanda Oropeo a tende kaba ku otro aña nan lo haña un promedio di 2.1 porshento mas pa gasta, pa e habitantenan di e munisipionan karibense esaki ainda no ta konosí. E munisipionan ekstraordinario – i espesialmente Boneiru – tin hopi aña kaba ta lucha ku pobresa, algu ku kuminsamentu di e luna aki a sali tambe den e rapòrt di investigashon di defensor di pueblo nashonal, den kua tin pará ku ‘40 porshento di ansianonan ta biba den pobresa i regularmente no tin di kome’.
Mal kaminda i mal transpòrt
Gobièrnu hulandes ademas ta primintí – meskos ku aña pasá – ‘un mehorashon di infrastruktura’ na Hulanda Karibense. E mal estado di e kamindanan, e transporte aéreo karu entre e islanan – e úniko manera pa biaha entre e islanan – i e falta di transpòrt públiko ta un tehi pa e habitantenan. Na Sint Eustatius tin ‘eroshon di tera’ i e habitantenan ta mira partinan grandi di nan isla ta disparsé den laman.
No ta bini elekshon nobo
Hulanda na 2020 ke traha na ‘mihó gobièrnu na e islanan’. Aktualmente henter e fókùs ta riba Sint Eustatius. Na 2018 Hulanda a manda e gobièrnu ei kas, pa motibu di ‘deskuido grave di nan gobièrnu’.
Despues ku Hulanda a tuma gobièrnu di Statia ofer nan a primintí di ‘trata e problemanan di mas grandi na 2019, un ‘intervenshon ‘gubernamental mas kòrtiku posibel, pero mes largu ku tin nodi’, segun ministerio. Pero den un aña i mei e mandatarionan hulandes ainda no a logra di drecha maneho finansiero na e isla. No ta kla ki dia si.
Gobièrnu Hulandes ta ferwagt si ku tantu e reorganisashon di e munisipio ekstraordinario i tur previshon nobo di ICT lo ta kla otro aña. Na Den Haag ta ferwagt klaridat denter di algun siman tokante elekshonnan nobo.
Krísis venesolano
E krísis venesolano i su konsekuenshanan pa Aruba, Boneiru i Kòrsou tambe a palabrá den e diskurso.
“E krísis polítiko i humanitario na Venezuela tambe ta konfrontá e parti karibense di Reino ku e menasa di migrashon na gran eskala i e konsekuenshanan ekonómiko di esaki’, Rei a bisa.
Gabinete hulandes lo usa kasi 24 mion euro e aña aki pa sostené islanan ABC. E sèn aki ta espesialmente pa trata i deportá venesolano mas rápido posibel. Tambe lo tin sèn ta bai pa buska refugiado di barku riba laman. Espesialmente e ministerionan di Defensa i Hustisia i Seguridat lo ehekutá esaki.