ORANJESTAD – Habitantenan di Sint Eustatius aki un aña por bai urna pa skohe nan miembronan di konseho insular. Despues di esaki tambe Hulanda lo keda na mando.
Esaki sekretario di estado Raymond Knops (Relashonnan den Reino) a divulgá durante un enkuentro ku habitante djaluna anochi. E elekshonnan di 21 di òktober 2020 segun Knops mester mira komo ‘un próksimo paso den drechamentu’ di demokrasia lokal.
Gobièrnu hulandes for di febrüari 2018 ta goberná e munisipio ekstraordinario e mes, pasobra e gobièrnu lokal lo a kibra lei. A manda tur miembro di konseho insular i mandatario lokal kas.
‘Ousensia di lei’, mal maneho finansiero, diskriminashon, menasa i kapricho tabata karakterisá e gobièrnu lokal, un komishon di sabio a konkluí.
Krítika
Djaluna anochi e komisario di gobièrnu a nenga e krítika ku e lo no ta komuniká ku e habitantenan. “Tur djarason boso por a traha un sita pa papia tokante outonomia òf loke sea”, Mike Franco a bisa. “Esaki a sosodé tambe. Asta nos tabatin enkuentro ku partidonan polítiko.”
‘A dura mas ku a spera’
Ta remarkabel ku e kapasidat gubernamental na e isla bou di gobièrnu hulandes tambe ta mir’é komo un problema grandi, motibu pa kua ta tarda pa haña resultado.
Na e isla e komisario di gobièrnu hulandes i e ámtenarnan ta haña e trabou ‘pisá’. “E ora ei bo mester pone prioridat”, segun Knops.
“A dura mas largu ku mi mes a spera. Pero mi ta desididu di kumpli ku e promesanan ku nos a hasi na boso.”
Mehorashon
Segun e sekretario di estado ya kaba por mira hopi mehorashon na e isla. A reforsá e murayanan haltu di baranka pa kombatí eroshon di añanan. Tambe a mehora prosesamentu di shushi i a kita un 300 outo kibra for di e isla.
Banda di esaki a usa gran parti di un 9.5 mion dòler pa drecha kas i infrastruktura despues di orkan Irma. E aña aki lo bini mas plaka for di Den Haag pa entre otro konstrukshon di kas popular i hür mas abou.
Kiko Tweede Kamer ta haña?
Ku na Sint Eustatius ta drecha demokrasia lokal ‘un pia un pia’, ta kuadra ku e deseo di Tweede Kamer. Pa tin un konseho insular ta ‘e promé paso’ segun Knops.
Pa tene elekshon promé mester aprobá un proposishon di lei den parlamento hulandes. Segun e sekretario di estado esaki lo sosodé ‘mas pronto posibel’.
E ora ei ta na Tweede Kamer di disidí si en bèrdat mester tene elekshon aki un aña. Mester planeá e debate ei. Posiblemente e miembronan di Tweede Kamer lo pidi pa tene e elekshonnan mas promé.
